ദുബായ് : ഏതാനും വർഷങ്ങൾക്ക് മുൻപ് ജോലി നഷ്ടപ്പെട്ട് മനസ്സ് തകർന്ന ഒരു അറുപതുകാരനായ പിതാവിന് വേണ്ടി മക്കൾ കെട്ടിപ്പടുത്ത ഒരു കൊച്ചു ബിസിനസ്സ് ഇന്ന് ദുബായിലും ഷാർജയിലുമായി അഞ്ച് ബ്രാഞ്ചുകളുള്ള വൻ വിജയഗാഥയായി മാറുന്നു. ഫിലിപ്പീൻ സ്വദേശിയായ അന്റോണിയോ ഡേവിഡ് എന്ന മുൻ ഡ്രൈവറുടെയും കുടുംബത്തിന്റെയും ഉടമസ്ഥതയിലുള്ള ‘റസ്സൽ ഡേവ് ബേക്കറി’യുടെ (Russell Dave Bakery) പ്രചോദനാത്മകമായ വളർച്ചയാണ് ഇപ്പോൾ പ്രവാസി ലോകത്ത് ശ്രദ്ധേയമാകുന്നത്.
തങ്ങളുടെ ഒൻപത് മക്കളെ വളർത്താൻ ജീവിതകാലം മുഴുവൻ കഷ്ടപ്പെട്ട പിതാവിന് ജോലി നഷ്ടപ്പെട്ടപ്പോൾ, മറ്റൊരാളുടെ സ്വപ്നത്തിന് വേണ്ടി ജോലി ചെയ്യുന്നതിന് പകരം നമുക്കായി ഒരു സ്വന്തം ബിസിനസ്സ് തുടങ്ങിക്കൂടേ എന്ന വലിയ മകൾ ജോവാന്റെ ചിന്തയാണ് ഈ വിജയത്തിന് അടിത്തറയിട്ടത്. ജോവാൻ എടുത്ത ബാങ്ക് ലോണിന്റെ തുകയുമായി 2023 ജൂലൈയിൽ ദുബായ് ഇന്റർനാഷണൽ സിറ്റിയിലെ ഒരു ചെറിയ കടയിലാണ് ഇവർ ആദ്യ ബേക്കറി ആരംഭിച്ചത്. തുടക്കത്തിൽ അന്റോണിയോയുടെ സഹോദരൻ വെറും 5 കിലോ മൈദ ഉപയോഗിച്ച് ഉണ്ടാക്കിയ പരമ്പരാഗത ഫിലിപ്പീൻ ബ്രെഡുകൾ ഡ്രാഗൺ മാർട്ടിനടുത്തുള്ള തൊഴിലാളികൾക്കും കടകൾക്കും അന്റോണിയോ നേരിട്ട് എത്തിച്ചു നൽകുകയായിരുന്നു.
രുചിക്കൂട്ടുകളുടെ ഗുണമേന്മ കൊണ്ട് സോഷ്യൽ മീഡിയ വഴി ഉപഭോക്താക്കൾ തന്നെ ബേക്കറിയെക്കുറിച്ച് പരസ്യം നൽകിയതോടെ ബിസിനസ്സ് അതിവേഗം വളർന്നു. നിലവിൽ അഞ്ച് ബ്രാഞ്ചുകളിലായി അമ്പതിലധികം ജീവനക്കാരുള്ള ഈ കുടുംബ സംരംഭത്തിൽ അന്റോണിയോയുടെ മക്കളായ അക്കൗണ്ടന്റുമാരും ആർക്കിടെക്റ്റുകളും അധ്യാപകരുമെല്ലാം ഒത്തൊരുമയോടെ ജോലി ചെയ്യുന്നുണ്ട്. ഫിലിപ്പീൻസുകാർക്ക് പുറമെ മറ്റ് വിദേശികളും ഇപ്പോൾ ഇവരുടെ ബ്രെഡ് തേടിയെത്തുന്നുണ്ടെന്നും, കഠിനാധ്വാനത്തിലൂടെ ദാരിദ്ര്യത്തെ മറികടക്കാൻ കഴിയുമെന്ന് തങ്ങളുടെ ജീവിതം തെളിയിക്കുന്നതായും കുടുംബം വ്യക്തമാക്കുന്നു.