ഫുജൈറ : ഉപഭോക്തൃ അവകാശങ്ങൾ സംരക്ഷിക്കുന്നതിനായി സ്ഥാപനങ്ങളിലെ നിയമലംഘനങ്ങളോ കേടുപാടുകളോ മൊബൈൽ ഫോണിൽ പകരർത്താൻ നിയമപരമായ അവകാശമുണ്ടെങ്കിലും, അത് സോഷ്യൽ മീഡിയയിലോ വാട്ട്‌സ്ആപ്പ് ഗ്രൂപ്പുകളിലോ പ്രചരിപ്പിക്കുന്നത് മാനനഷ്ടക്കേസിന് കാരണമാകുമെന്ന് യുഎഇ നിയമവിദഗ്ദ്ധരുടെയും ഫെഡറൽ സുപ്രീം കോടതിയുടെയും മുന്നറിയിപ്പ്. തെളിവുകൾ ശേഖരിച്ച് ഔദ്യോഗിക അധികാരികൾക്ക് സമർപ്പിക്കുന്നതും, പൊതുജനമധ്യത്തിൽ പ്രചരിപ്പിച്ച് സ്ഥാപനങ്ങളെ അധിക്ഷേപിക്കുന്നതും തമ്മിൽ നിയമപരമായി വലിയ വ്യത്യാസമുണ്ടെന്ന് അഭിഭാഷകർ വ്യക്തമാക്കുന്നു.
സൂപ്പർമാർക്കറ്റിൽ നിന്ന് വാങ്ങിയ ഉൽപ്പന്നത്തിൽ പ്രാണികളെ കണ്ടെത്തിയത് വീഡിയോയിൽ പകർത്തി അധികൃതർക്ക് അയച്ചുകൊടുത്ത ഉപഭോക്താവിനെതിരെ സൂപ്പർമാർക്കറ്റ് മാനേജ്‌മെന്റ് നൽകിയ അപകീർത്തി കേസ് തള്ളിക്കൊണ്ടാണ് ഫെഡറൽ സുപ്രീം കോടതി ഈ നിർണ്ണായക തത്വം വ്യക്തമാക്കിയത്. അപ്പീൽ കോടതി 3,000 ദിർഹം പിഴ ചുമത്തിയ കേസിൽ ഫെഡറൽ സുപ്രീം കോടതി ഉപഭോക്താവിനെ പൂർണ്ണമായി കുറ്റവിമുക്തനാക്കുകയായിരുന്നു. വീഴ്ചകൾ തെളിവായി പകർത്തി ബന്ധപ്പെട്ട വകുപ്പുകൾക്ക് മാത്രം അയക്കുന്നത് തട്ടിപ്പല്ലെന്നും, എന്നാൽ ‘ഇത് ആരും വാങ്ങരുത്’ എന്ന തരത്തിലുള്ള വാചകങ്ങളോടെ ഫെയ്‌സ്ബുക്ക്, ഇൻസ്റ്റഗ്രാം, വാട്ട്‌സ്ആപ്പ് ഗ്രൂപ്പുകൾ എന്നിവയിൽ പ്രചരിപ്പിക്കുന്നത് വലിയ പിഴയും നിയമനടപടിയും ക്ഷണിച്ചുവരുത്തുമെന്നും പ്രമുഖ അഭിഭാഷകനായ മുഹമ്മദ് അലി അൽ ഹമ്മാദി ചൂണ്ടിക്കാട്ടി.