ദുബായ് : വെറുമൊരു കാപ്പി തയ്യാറാക്കൽ എന്നതിലുപരി മികച്ച ഉപഭോക്തൃ സേവനത്തിലൂടെയും ഉത്തരവാദിത്തത്തിലൂടെയും കഫേ മേഖലയിൽ വിജയകരമായ കരിയർ കെട്ടിപ്പടുക്കുകയാണ് യുഎഇയിലെ അഞ്ച് എമിറാത്തി വനിതകൾ. ദുബായ് അടക്കമുള്ള വിവിധ എമിറേറ്റുകളിലെ സ്റ്റാർബക്സ് ഔട്ട്ലെറ്റുകളിൽ ബാരിസ്റ്റകളായും ഷിഫ്റ്റ് സൂപ്പർവൈസർമാരായും ജോലി ചെയ്യുന്ന ഷൂഖ്, നൗഫ്, ശൈഖ, ആയിഷ, ലൈല എന്നിവരാണ് കഠിനാധ്വാനത്തിലൂടെ തങ്ങളുടെ ജീവിതവും വ്യക്തിത്വവും മാറ്റിയെഴുതിയത്. തുടക്കത്തിൽ അപരിചിതരോട് സംസാരിക്കാൻ പോലും മടിച്ചിരുന്ന ഇവർ, ഉപഭോക്താക്കളുടെ പിന്തുണയിലൂടെയും കഫേ മാനേജ്‌മെന്റ് പഠനത്തിലൂടെയും ആത്മവിശ്വാസത്തോടെ സ്വന്തം സംരംഭങ്ങൾ ആരംഭിക്കുക എന്ന വലിയ സ്വപ്നങ്ങളിലേക്ക് നടന്നു കയറുകയാണ്.
സ്വന്തം ജോലിയിൽ അഭിമാനം കണ്ടെത്തുന്ന ഈ വനിതകൾ, ജോലി ഏതായാലും നേരിട്ട് അനുഭവിച്ചറിയാതെ മുൻവിധികളോടെ കാണരുതെന്ന വലിയ സന്ദേശമാണ് സമൂഹത്തിന് നൽകുന്നത്. സ്വദേശി വനിതകൾ ഇത്തരം മേഖലകളിൽ ജോലി ചെയ്യുന്നതിനെതിരെ ചില എതിർപ്പുകൾ ഉയർന്നെങ്കിലും, തൊഴിൽ ചെയ്യുന്നതിൽ നാണക്കേടില്ലെന്ന ഉറച്ച നിലപാടോടെയാണ് ഇവർ മുന്നോട്ട് പോയത്. സ്വന്തമായി കഫേകൾ ആരംഭിക്കാനും ബിസിനസ്സ് രംഗത്ത് വലിയ ഉയരങ്ങൾ കീഴടക്കാനും സഹായിക്കുന്ന മികച്ച അനുഭവസമ്പത്താണ് ഇത്തരം കഫേകൾ നൽകുന്നതെന്ന് ഇവർ സാക്ഷ്യപ്പെടുത്തുന്നു.
14