ഷാർജ : ഷാർജയെയും ഒമാനെയും ബന്ധിപ്പിക്കുന്ന ലോജിസ്റ്റിക്സ് ഇടനാഴിയിലൂടെയുള്ള ചരക്കുനീക്കത്തിൽ വൻ വർദ്ധനവ്. പ്രവർത്തനം ആരംഭിച്ച ആദ്യ മൂന്ന് മാസത്തിനുള്ളിൽ ഏകദേശം 1.7 ബില്യൺ ദിർഹം (170 കോടി) മൂല്യമുള്ള ചരക്കുകളാണ് ഈ പാതയിലൂടെ കൈകാര്യം ചെയ്തത്. കഴിഞ്ഞ വർഷം സമാന കാലയളവിനെ അപേക്ഷിച്ച് 66.26 ശതമാനത്തിന്റെ വർദ്ധനവാണ് വ്യാപാര രംഗത്തുണ്ടായിരിക്കുന്നത്. ഈ കാലയളവിൽ 34,000-ത്തിലധികം ട്രക്കുകൾ ഈ ഇടനാഴിയിലൂടെ കടന്നുപോയതായും കസ്റ്റംസ് അധികൃതർ 32,000-ത്തിലധികം ഡിക്ലറേഷനുകൾ പ്രോസസ്സ് ചെയ്തതായും ഔദ്യോഗിക കണക്കുകൾ വ്യക്തമാക്കുന്നു. ഇരുരാജ്യങ്ങളും തമ്മിലുള്ള ചരക്കുനീക്കം വേഗത്തിലാക്കാനും പ്രാദേശിക സപ്ലൈ ചെയിൻ സംവിധാനങ്ങൾ കൂടുതൽ കാര്യക്ഷമമാക്കാനുമാണ് ഷാർജ പോർട്സ്, കസ്റ്റംസ് ആൻഡ് ഫ്രീ സോൺ അതോറിറ്റിയും ഒമാൻ കസ്റ്റംസും ചേർന്ന് ഈ പദ്ധതി ആരംഭിച്ചത്.
