ലോകത്തിലെ മികച്ച പത്ത് സ്കൂളുകളുടെ പട്ടികയിൽ യുഎഇയിലെ രണ്ട് വിദ്യാലയങ്ങൾ

ദുബായ് : ആഗോള വിദ്യാഭ്യാസ രംഗത്തെ ഏറ്റവും അഭിമാനകരമായ പുരസ്കാരങ്ങളിലൊന്നായ ‘വേൾഡ്സ് ബെസ്റ്റ് സ്കൂൾ പ്രൈസസ് 2026’ (World’s Best School Prizes 2026)ന്റെ അവസാന പത്ത് സ്കൂളുകളുടെ പട്ടികയിൽ യുഎഇയിൽ നിന്നുള്ള രണ്ട് വിദ്യാലയങ്ങൾ ഇടംപിടിച്ചു. ഷാർജയിലെ ‘അപ്ലൈഡ് ടെക്നോളജി സ്കൂളും’ (ATS Sharjah), ‘നോർഡ് ആംഗ്ലിയ ഇന്റർനാഷണൽ സ്കൂൾ ദുബായുമാണ്’ (NAS Dubai) ഈ അന്താരാഷ്ട്ര ബഹുമതിക്ക് അർഹരായത്. വിദ്യാർത്ഥികളുടെ ആരോഗ്യ സംരക്ഷണം, സാമൂഹിക പങ്കാളിത്തം എന്നീ മേഖലകളിലെ മികച്ച പ്രവർത്തനങ്ങളാണ് ഇവരെ ഈ നേട്ടത്തിന് അർഹരാക്കിയത്.
പൊതു വിദ്യാലയമായ എടിഎസ് ഷാർജ, വിദ്യാർത്ഥികൾക്കായി വികസിപ്പിച്ചെടുത്ത ‘ഇന്റലിജന്റ് ഹെൽത്തി ഫുഡ് ഡിസ്പെൻസിങ് സൊല്യൂഷൻ’ എന്ന സാങ്കേതികവിദ്യയിലൂടെയാണ് ആരോഗ്യ സംരക്ഷണ വിഭാഗത്തിൽ ആദ്യ പത്തിൽ എത്തിയത്. അലർജി സാധ്യതകൾ ഒഴിവാക്കാനും മികച്ച ഭക്ഷണരീതി തിരഞ്ഞെടുക്കാനും ഈ സംവിധാനം കുട്ടികളെ സഹായിക്കുന്നു. അതേസമയം, ദുബായ് എൻഎഎസ് സ്കൂൾ വിവിധ രാജ്യക്കാരായ വിദ്യാർത്ഥികളെയും രക്ഷിതാക്കളെയും ഒരുമിച്ച് നിർത്തിക്കൊണ്ട് നടത്തിയ സാമൂഹിക പ്രവർത്തനങ്ങളുടെ മികവിലാണ് ‘കമ്മ്യൂണിറ്റി കൊളാബറേഷൻ’ വിഭാഗത്തിൽ തിരഞ്ഞെടുക്കപ്പെട്ടത്. അഞ്ച് വിഭാഗങ്ങളിലായി നടക്കുന്ന ഈ മത്സരത്തിന്റെ വിജയികളെ നവംബറിൽ പ്രഖ്യാപിക്കും. ജൂൺ 25 മുതൽ പൊതുജനങ്ങൾക്കായി വോട്ടിംഗ് ലൈവായി ആരംഭിച്ചിട്ടുണ്ട്.