അബുദാബി : യുഎഇയിലെ ഭാവി തലമുറയെ ആർട്ടിഫിഷ്യൽ ഇന്റലിജൻസിന്റെയും പുത്തൻ സാങ്കേതികവിദ്യകളുടെയും ലോകത്തേക്ക് നയിക്കുക എന്ന ലക്ഷ്യത്തോടെ ഐഐടി ഡൽഹി – അബുദാബി കാമ്പസ് തങ്ങളുടെ അഭിമാന പദ്ധതിയായ ‘അൽ-ഇബ്തികാർ’ സ്കൂൾ ഔട്ട്രീച്ച് പ്രോഗ്രാമിന് തുടക്കം കുറിക്കുന്നു. ഇതിന്റെ ആദ്യപടിയായി യുഎഇയിലെ 11, 12 ക്ലാസുകളിലെ വിദ്യാർത്ഥികൾക്കായി 2026 ജൂലൈ 6 മുതൽ 8 വരെ മൂന്ന് ദിവസത്തെ റെസിഡൻഷ്യൽ ‘യുഎഇ ഇന്നൊവേഷൻ ആൻഡ് എഐ ബൂട്ട്ക്യാമ്പ്’ സംഘടിപ്പിക്കും.
ആഗോള ക്യുഎസ് വേൾഡ് യൂണിവേഴ്സിറ്റി റാങ്കിംഗിൽ ഇന്ത്യയിൽ ഒന്നാമതുള്ള ഐഐടി ഡൽഹിയുടെ അന്താരാഷ്ട്ര കാമ്പസായ അബുദാബി കാമ്പസിലാണ് ഈ ചരിത്രപരമായ സംരംഭം അരങ്ങേറുന്നത്. അറബി ഭാഷയിൽ ‘നൂതനാശയങ്ങൾ’ അല്ലെങ്കിൽ ‘കണ്ടുപിടുത്തം’ എന്ന് അർത്ഥം വരുന്ന ‘അൽ-ഇബ്തികാർ’ എന്ന ഈ പദ്ധതിയിലൂടെ സ്കൂൾ തലം മുതൽ തന്നെ കുട്ടികളിൽ എഞ്ചിനീയറിംഗ്, സംരംഭകത്വ ചിന്താഗതികൾ വളർത്തിയെടുക്കുകയാണ് ലക്ഷ്യമിടുന്നത്. വിദ്യാർത്ഥികൾക്ക് വെറും പുസ്തക അറിവുകൾക്കപ്പുറം കൃത്രിമ ബുദ്ധിയിലെ യഥാർത്ഥ വെല്ലുവിളികളെ നേരിടാനും ഗ്രൂപ്പ് ചർച്ചകളിലൂടെയും വിദഗ്ദ്ധരുടെ മാർഗ്ഗനിർദ്ദേശങ്ങളിലൂടെയും പുതിയ പരിഹാരങ്ങൾ കണ്ടെത്താനും ഈ മൂന്ന് ദിവസത്തെ ക്യാമ്പ് മികച്ച അവസരമൊരുക്കും. കേവലമൊരു ഒറ്റപ്പെട്ട പരിപാടിയായല്ല, മറിച്ച് യുഎഇയുടെ നാളത്തെ ശാസ്ത്ര സാങ്കേതിക നേതൃത്വത്തെ നിരന്തരമായ പരിശീലനത്തിലൂടെയും മെന്റർഷിപ്പിലൂടെയും വളർത്തിയെടുക്കുന്ന ഒരു സുസ്ഥിര പ്രക്രിയയായാണ് ഐഐടി ഡൽഹി അബുദാബി ഈ പദ്ധതിയെ രൂപകൽപ്പന ചെയ്തിരിക്കുന്നത്.