സ്വദേശി സംരംഭകർക്ക് വൻ കൈത്താങ്ങുമായി ദുബായ്

ദുബായ് : ദുബായിലെ സ്വദേശി ചെറുകിട-ഇടത്തരം സംരംഭങ്ങളെ (SMEs) പ്രോത്സാഹിപ്പിക്കുന്നതിനായുള്ള ‘എമിറാത്തി സപ്ലയർ പ്രോഗ്രാം’ വഴി 2025-ൽ 1.78 ശതകോടി ദിർഹത്തിന്റെ കരാറുകൾ നൽകിയതായി ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അറിയിച്ചു. മുൻവർഷത്തെ അപേക്ഷിച്ച് കരാർ മൂല്യത്തിൽ 38 ശതമാനത്തിന്റെ വൻ വർദ്ധനവാണ് രേഖപ്പെടുത്തിയിരിക്കുന്നത്. ദുബായ് ഇക്കണോമിക് അജണ്ട (D33) ലക്ഷ്യങ്ങൾ കൈവരിക്കുന്നതിനും പ്രാദേശിക സംരംഭകരെ പിന്തുണയ്ക്കുന്നതിനുമായാണ് ഈ പദ്ധതി നടപ്പിലാക്കുന്നത്. മൊത്തം കരാറുകളിൽ 1.03 ശതകോടി ദിർഹം സർക്കാർ സ്ഥാപനങ്ങളും, 420.5 ദശലക്ഷം ദിർഹം സെമി-ഗവൺമെന്റ് സ്ഥാപനങ്ങളുമാണ് നൽകിയത്. ബാക്കി തുക സ്വകാര്യ മേഖലയിൽ നിന്നും ഫെഡറൽ സ്ഥാപനങ്ങളിൽ നിന്നുമാണ് ലഭ്യമായത്. നിലവിൽ 1,070 സ്വദേശി സ്ഥാപനങ്ങൾ ഈ പദ്ധതിയുടെ ഭാഗമായി പ്രവർത്തിക്കുന്നുണ്ട്.