ദുബായിൽ 4 പുതിയ പാലങ്ങളും തുരങ്കങ്ങളും: യാത്ര ഇനി വേഗത്തിലാകും

ദുബായ് : ദുബായിലെ റോഡുകളിലെ ഗതാഗതക്കുരുക്ക് അഴിച്ച് യാത്ര കൂടുതൽ എളുപ്പമാക്കുന്നതിനായി 4 പ്രധാന കവലകളിൽ പുതിയ പാലങ്ങളും തുരങ്കങ്ങളും (Tunnels) നിർമ്മിച്ച് വിപുലീകരിക്കുന്നു. ഊദ് മേത്ത, അൽ അസായൽ സ്ട്രീറ്റ് വികസന പദ്ധതിയുടെ ഭാഗമായാണ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) ഈ നിർമ്മാണ പ്രവർത്തനങ്ങൾ നടത്തുന്നത്. പദ്ധതി പൂർത്തിയാകുന്നതോടെ നിലവിലെ 20 മിനിറ്റ് യാത്രാസമയം വെറും 5 മിനിറ്റായി കുറയും.
സബീൽ, അൽ ജദ്ദാഫ്, ഊദ് മേത്ത, ഉമ്മു ഹുറൈർ തുടങ്ങിയ പ്രധാന മേഖലകളിലെ ഗതാഗതം സുഗമമാക്കാൻ ഇത് സഹായിക്കും. പദ്ധതിയുടെ ഭാഗമായുള്ള 3 വരി പാലം ഇതിനോടകം ഗതാഗതത്തിനായി തുറന്നുകൊടുത്തു. ഓഗസ്റ്റ് അവസാനത്തോടെ രണ്ട് തുരങ്കങ്ങളും ഒരു പാലവും കൂടി പ്രവർത്തനസജ്ജമാകും. ഗർഹൂദ് ബ്രിഡ്ജ്, ദുബായ്-അൽ ഐൻ റോഡ്, ബിസിനസ് ബേ ക്രോസിംഗ് തുടങ്ങിയ പ്രധാന പാതകളിലേക്കുള്ള ഗതാഗത ശേഷി വലിയ തോതിൽ വർധിപ്പിക്കുന്ന രീതിയിലാണ് ലൈനുകളുടെ എണ്ണം കൂട്ടി പുതിയ മേൽപ്പാലങ്ങളും അണ്ടർപാസുകളും ഒരുക്കിയിരിക്കുന്നത്.