ഷാർജ : തിരക്കേറിയ റോഡുകൾ മുതൽ ജനവാസ മേഖലകളും വ്യവസായ കേന്ദ്രങ്ങളും വരെ നിരീക്ഷിച്ചുകൊണ്ട് ഷാർജയിലെ 1,72,544 ഹൈടെക് സിസിടിവി ക്യാമറകളുടെ ശൃംഖല എമിറേറ്റിന്റെ സുരക്ഷ ഉറപ്പാക്കുന്നു. ഷാർജ പോലീസിന് കീഴിൽ പ്രവർത്തിക്കുന്ന ഈ നൂതന ക്യാമറ ശൃംഖല കാരണം തങ്ങൾക്ക് പൂർണ്ണ സുരക്ഷിതത്വം അനുഭവപ്പെടുന്നുണ്ടെന്ന് 99.7 ശതമാനം നിവാസികളും സർവേയിൽ വ്യക്തമാക്കി.
ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ (ANPR), കൃത്രിമബുദ്ധി അധിഷ്ഠിത വിശകലന സംവിധാനങ്ങൾ (Analytical Cameras), മുൻകൂട്ടി മുന്നറിയിപ്പ് നൽകുന്ന ടെക്നോളജികൾ എന്നിവ ഉൾപ്പെടുന്നതാണ് ഈ സുരക്ഷാ ശൃംഖല. കുറ്റകൃത്യങ്ങൾ തടയുന്നതിനും കളവ് പോയ വാഹനങ്ങൾ കണ്ടെത്താനും ഹിറ്റ് ആൻഡ് റൺ കേസുകളിലെ പ്രതികളെ പിടികൂടാനും ഗതാഗത ലംഘനങ്ങൾ നിരീക്ഷിക്കാനും ഈ സിസിടിവി ദൃശ്യങ്ങൾ പോലീസിനെ സഹായിക്കുന്നുണ്ട്. ജനങ്ങളുടെ സുരക്ഷ ഉറപ്പാക്കുന്നതിന്റെ ഭാഗമായി റസിഡൻഷ്യൽ, വാണിജ്യ സമുച്ചയങ്ങളിൽ നിരീക്ഷണ ക്യാമറകൾ കൃത്യമായി ഘടിപ്പിക്കാത്ത സ്ഥാപനങ്ങൾക്ക് 5,000 മുതൽ 15,000 ദിർഹം വരെ പിഴ ഈടാക്കുമെന്നും ഷാർജ പോലീസ് ഓർമ്മിപ്പിച്ചു.