ദുബായ് : യുഎഇയിൽ നിന്ന് സർവീസ് നടത്തുന്ന വിവിധ പ്രമുഖ വിമാനക്കമ്പനികൾ സർവീസുകളിൽ മാറ്റം വരുത്തുകയും ചില റൂട്ടുകൾ റദ്ദാക്കുകയും ചെയ്ത പശ്ചാത്തലത്തിൽ, വിമാനത്താവളത്തിലേക്ക് തിരിക്കും മുൻപ് യാത്രക്കാർ സർവീസ് സ്റ്റാറ്റസ് പരിശോധിച്ച് ഉറപ്പുവരുത്തണമെന്ന് അധികൃതർ മുന്നറിയിപ്പ് നൽകി. എമിറേറ്റ്സ്, എത്തിഹാദ്, ഫ്ലൈദുബായ്, എയർ അറേബ്യ തുടങ്ങിയ എയർലൈനുകൾ മേഖലയിലെ സുരക്ഷാസാഹചര്യങ്ങൾ മുൻനിർത്തി ഏതാനും പ്രാദേശിക റൂട്ടുകളിലെ സർവീസുകളാണ് റദ്ദാക്കുകയോ പുനഃക്രമീകരിക്കുകയോ ചെയ്തിട്ടുള്ളത്.
യുഎഇയിലെ പ്രധാന വിമാനത്താവളങ്ങളെല്ലാം നിലവിൽ സാധാരണ നിലയിൽ പ്രവർത്തിക്കുന്നുണ്ടെങ്കിലും, പരിശോധനകൾക്കും ഇമിഗ്രേഷൻ നടപടികൾക്കും സാധാരണയേക്കാൾ കൂടുതൽ സമയം ആവശ്യമായി വന്നേക്കാം. ഇതിനാൽ ആവശ്യമായ സമയത്തിന് മുൻപായി തന്നെ വിമാനത്താവളത്തിൽ എത്തുവാൻ യാത്രക്കാരോട് നിർദ്ദേശിച്ചിട്ടുണ്ട്. സർവീസുകളിൽ വരുന്ന പെട്ടെന്നുള്ള മാറ്റങ്ങൾ SMS, ഇമെയിൽ എന്നിവയിലൂടെ അറിയുന്നതിനായി യാത്രാ വിവരങ്ങൾ അപ്ഡേറ്റ് ചെയ്യാനും വിമാനക്കമ്പനികളുടെ ഔദ്യോഗിക വെബ്സൈറ്റുകളോ മൊബൈൽ ആപ്പുകളോ വഴി വിവരങ്ങൾ തൽസമയം നിരീക്ഷിക്കാനും നിർദ്ദേശമുണ്ട്.