വ്യാജ വണ്ണം കുറയ്ക്കൽ മരുന്ന് വിൽപ്പന: യുഎഇയിൽ 71 കേന്ദ്രങ്ങൾക്കെതിരെ നടപടി

അബുദാബി : വണ്ണം കുറയ്ക്കാനെന്ന വ്യാജേന അംഗീകാരമില്ലാത്ത പെപ്റ്റൈഡ് അടങ്ങിയ മരുന്നുകൾ വിപണം നടത്തുകയും പ്രചരിപ്പിക്കുകയും ചെയ്ത 71 കേന്ദ്രങ്ങൾക്കെതിരെ ശക്തമായ നടപടിയുമായി എമിറേറ്റ്സ് ഡ്രഗ് എസ്റ്റാബ്ലിഷ്മെന്റ് (EDE). കൃത്യമായ ലൈസൻസില്ലാതെ ഡിജിറ്റൽ പ്ലാറ്റ്‌ഫോമുകൾ വഴി മരുന്നുകൾ പരസ്യം ചെയ്യുകയും വിൽക്കാൻ സഹായിക്കുകയും ചെയ്ത 14 പ്രമുഖ സോഷ്യൽ മീഡിയ ഇൻഫ്ലുവൻസർമാരെ EDE നാഷണൽ മീഡിയ ഓഫീസിന് മുന്നിൽ ഹാജരാക്കി. കൂടാതെ നിയമലംഘനം നടത്തിയ 14 സ്ഥാപനങ്ങൾക്കെതിരെയും നിയമനടപടികൾ സ്വീകരിച്ചിട്ടുണ്ട്.
വൈദ്യശാസ്ത്രപരമായി ഗവേഷണ ഘട്ടത്തിൽ മാത്രമുള്ളതും യുഎഇയിൽ ഉപയോഗാനുമതി ഇല്ലാത്തതുമായ മരുന്നുകളാണ് ഇൻഫ്ലുവൻസർമാരെ ഉപയോഗിച്ച് സോഷ്യൽ മീഡിയ വഴി വിറ്റഴിച്ചിരുന്നത്. ഔദ്യോഗിക ലൈസൻസുള്ള ഫാർമസികളിൽ നിന്നല്ലാതെ ഓൺലൈൻ വഴിയോ സോഷ്യൽ മീഡിയ വഴിയോ തരംതിരിക്കാത്ത മരുന്നുകൾ വാങ്ങരുതെന്ന് EDE കർശന മുന്നറിയിപ്പ് നൽകി. പൊതുജനങ്ങളുടെ ആരോഗ്യം മുൻനിർത്തി രാജ്യത്തുടനീളമുള്ള ഫാർമസികളിലും വിതരണ കേന്ദ്രങ്ങളിലും EDE പ്രത്യേക പരിശോധന വ്യാപിപ്പിച്ചിട്ടുണ്ട്.