ആഗോള റാങ്കിംഗിൽ മുന്നേറി ദുബായ്

ദുബായ് : ലോകത്തിലെ ഏറ്റവും സമ്പന്നരായ വ്യക്തികളെ ആകർഷിക്കുന്ന നഗരങ്ങളുടെ ആഗോള പട്ടികയിൽ അതിവേഗ മുന്നേറ്റം നടത്തി ദുബായ്. ഹെൻലി ആൻഡ് പാർട്ണേഴ്സിന്റെ ‘വേൾഡ്സ് വെൽതിയസ്റ്റ് സിറ്റീസ് റിപ്പോർട്ട് 2025’ പ്രകാരം 81,200 മില്യനെയർമാരും, 100 മില്യൺ ഡോളറിലധികം നിക്ഷേപ ശേഷിയുള്ള 237 സെന്റി-മില്യനെയർമാരും, 20 ശതകോടീശ്വരന്മാരും (ബിസിനസ് ശതകോടീശ്വരന്മാർ) നിലവിൽ ദുബായിൽ വസിക്കുന്നുണ്ട്. 2014 മുതൽ 2024 വരെയുള്ള കാലയളവിൽ ദുബായിലെ മില്യനെയർമാരുടെ എണ്ണത്തിൽ 102 ശതമാനത്തിന്റെ വർധനവാണ് രേഖപ്പെടുത്തിയത്. ഇതോടെ ലോകത്തിലെ ഏറ്റവും സമ്പന്നമായ 50 നഗരങ്ങളുടെ പട്ടികയിൽ 21-ാം സ്ഥാനത്തുനിന്ന് 18-ാം സ്ഥാനത്തേക്ക് ദുബായ് ഉയർന്നു.
നിക്ഷേപ സൗഹൃദ നയങ്ങൾ, വ്യക്തിഗത വരുമാനത്തിനും മൂലധന നേട്ടത്തിനുമുള്ള പൂജ്യം ശതമാനം നികുതി, അന്താരാഷ്ട്ര സാമ്പത്തിക കേന്ദ്രമെന്ന നിലയിലുള്ള തന്ത്രപ്രധാനമായ വളർച്ച എന്നിവയാണ് ദുബായിലേക്ക് വൻതോതിൽ ആഗോള മൂലധനം ഒഴുകിയെത്താൻ കാരണമെന്ന് റിപ്പോർട്ട് വ്യക്തമാക്കുന്നു. വരുന്ന ദശകത്തിൽ ദുബായിലെയും അബുദാബിയിലെയും സെന്റി-മില്യനെയർമാരുടെ എണ്ണം ഇരട്ടിയിലധികമാകുമെന്നാണ് പ്രവചനം. ആഗോളതലത്തിൽ 3,84,500 മില്യനെയർമാരുമായി ന്യൂയോർക്ക് ഏറ്റവും സമ്പന്നമായ നഗരമായി ഒന്നാം സ്ഥാനം നിലനിർത്തിയപ്പോൾ സാന് ഫ്രാൻസിസ്കോ ബേ ഏരിയ രണ്ടാമതും ടോക്കിയോ മൂന്നാമതും സിംഗപ്പൂർ നാലാമതും സ്ഥാനങ്ങൾ നേടി.