പുതിയ ഹാർട്ട് ഇമേജിംഗ് സാങ്കേതികവിദ്യ ഗൾഫിൽ ആദ്യമായി ദുബായിൽ

ദുബായ് : ഹൃദയധമനികളിലെ തടസ്സങ്ങൾ കൂടുതൽ കൃത്യതയോടെ തിരിച്ചറിയാനും ചികിത്സിക്കാനും സഹായിക്കുന്ന അത്യാധുനിക ഹാർട്ട് ഇമേജിംഗ് സിസ്റ്റം ഗൾഫിൽ ആദ്യമായി അവതരിപ്പിച്ച് അസ്റ്റർ ഹോസ്പിറ്റൽ മൻഖൂൽ. ‘വിവോലൈറ്റ്’ വികസിപ്പിച്ചെടുത്ത ‘Cornaris P80/P80-E ഓപ്റ്റിക്കൽ കൊഹെറൻസ് ടോമോഗ്രഫി’ (OCT) പ്ലാറ്റ്‌ഫോമാണ് സങ്കീർണ്ണമായ ഹൃദയ ശസ്ത്രക്രിയയ്ക്കിടെ ആശുപത്രി വിജയകരമായി ഉപയോഗിച്ചത്. പരമ്പരാഗത ആൻജിയോഗ്രാഫിയേക്കാൾ വേഗത്തിലും കൃത്യതയിലും ധമനികളുടെ ഉള്ളിലെ തടസ്സങ്ങൾ, കാൽസ്യം അടിയുന്ന അവസ്ഥ, രക്തയോട്ടം എന്നിവ ഇൻഫ്രാറെഡ് വെളിച്ചം ഉപയോഗിച്ച് മൈക്രോസ്കോപ്പിക് തലത്തിൽ പരിശോധിക്കാൻ ഈ സാങ്കേതികവിദ്യയിലൂടെ ഡോക്ടർമാർക്ക് സാധിക്കും.
ന്യൂസ്‌വീക്കിന്റെ 2026-ലെ ഏറ്റവും മികച്ച ആശുപത്രികളുടെ പട്ടികയിൽ യുഎഇയിൽ നാലാം സ്ഥാനത്തുള്ള അസ്റ്റർ ഹോസ്പിറ്റലിൽ, നെഞ്ചുവേദനയെ തുടർന്ന് പ്രവേശിക്കപ്പെട്ട 52-കാരനായ ദുബായ് സ്വദേശിയിലാണ് ഈ സാങ്കേതികവിദ്യ ഉപയോഗിച്ച് ആദ്യമായി വിജയകരമായി ചികിത്സ പൂർത്തിയാക്കിയത്. ആൻജിയോപ്ലാസ്റ്റി, സ്റ്റെന്റ് ഇടൽ തുടങ്ങിയ പ്രക്രിയകളിൽ കൃത്യത ഉറപ്പാക്കാനും പാർശ്വഫലങ്ങൾ കുറയ്ക്കാനും പുതിയ സാങ്കേതികവിദ്യ ഏറെ സഹായിക്കുമെന്ന് അസ്റ്റർ ഹോസ്പിറ്റൽസ് ആന്റ് ക്ലിനിക്സ് യുകെ, ഒമാൻ, ബഹ്‌റൈൻ സിഇഒ ഡോ. ഷെർബാസ് ബിചു പറഞ്ഞു.