ദുബായിൽ ആദ്യമായി റോബോട്ടിക് ഹൃദയ വാൽവ് ശസ്ത്രക്രിയ വിജയകരം

ദുബായ് : യുഎഇയുടെ ആരോഗ്യരംഗത്ത് ചരിത്രം കുറിച്ചുകൊണ്ട് ദുബായിൽ ആദ്യമായി റോബോട്ടിക് മിട്രൽ വാൽവ് റിപ്പയർ (Robotic Mitral Valve Repair) ശസ്ത്രക്രിയ വിജയകരമായി പൂർത്തിയാക്കി. അമേരിക്കൻ ഹോസ്പിറ്റൽ ദുബായിലാണ് അത്യാധുനികമായ ഈ റോബോട്ടിക് ഹൃദയ ശസ്ത്രക്രിയ നടന്നത്. യുഎഇയിൽ ഈ അത്യാധുനിക സർജറി സൗകര്യമുള്ള ഏക ആശുപത്രിയും ഇതാണ്.
നെഞ്ച് പൂർണ്ണമായി തുറന്ന് നടത്തുന്ന പരമ്പരാഗത ഓപ്പൺ ഹാർട്ട് ശസ്ത്രക്രിയയ്ക്ക് പകരമായി, ചെറിയ ദ്വാരങ്ങളിലൂടെ ‘ഡാ വിഞ്ചി’ റോബോട്ടിക് സംവിധാനം ഉപയോഗിച്ചാണ് ഈ സർജറി നടത്തിയത്. ഹൃദയത്തിലെ വാൽവിന് ഗുരുതരമായ ചോർച്ച നേരിട്ട 60 വയസ്സുകാരനാണ് ശസ്ത്രക്രിയയ്ക്ക് വിധേയനായത്. കുറഞ്ഞ വേദന, കുറഞ്ഞ രക്തനഷ്ടം എന്നിവ ഉറപ്പാക്കുന്ന ശസ്ത്രക്രിയയ്ക്ക് ശേഷം മൂന്നാം ദിവസം തന്നെ രോഗി പൂർണ്ണ ആരോഗ്യവാനായി ആശുപത്രി വിട്ടു.