ദുബായ് : ഇന്ത്യയിലെ കോളേജ് പ്രവേശനത്തിനുള്ള സമയപരിധി അടുത്തിരിക്കെ, അടിയന്തിര ആവശ്യക്കാർക്കായി എൻആർഐ (NRI) സർട്ടിഫിക്കറ്റുകൾ നൽകുന്നതിന് പ്രത്യേക സേവനവുമായി ദുബായിലെ ഇന്ത്യൻ കോൺസുലേറ്റ്. ജൂലൈ 31-നോ അതിനു മുൻപോ സർട്ടിഫിക്കറ്റ് സമർപ്പിക്കേണ്ട അപേക്ഷകർക്കായി ശനിയാഴ്ച (ജൂലൈ 25, 2026) രാവിലെ 8:30 മുതൽ ഉച്ചയ്ക്ക് 12:00 വരെ ദുബായ് കോൺസുലേറ്റ് പരിസരത്ത് വാക്ക്-ഇൻ (Walk-in) സൗകര്യം ലഭ്യമാക്കുമെന്ന് അധികൃതർ അറിയിച്ചു.
തൊഴിൽ സർട്ടിഫിക്കറ്റും അപേക്ഷാ ഫോമിനൊപ്പം ആവശ്യമായ മുഴുവൻ രേഖകളും സഹിതമാണ് അപേക്ഷിക്കേണ്ടത്. കോൺസുലേറ്റിന്റെ ഗേറ്റ് നമ്പർ 1 വഴി പ്രവേശിക്കാം. ആദ്യം എത്തുന്നവർക്ക് ആദ്യം എന്ന മുൻഗണനാ ക്രമത്തിലായിരിക്കും അപേക്ഷകൾ സ്വീകരിക്കുന്നത്. ഉച്ചയ്ക്ക് 12 മണിക്ക് ശേഷം എത്തുന്ന അപേക്ഷകൾ സ്വീകരിക്കില്ലെന്നും, പ്രവേശന പ്രക്രിയ തടസ്സമില്ലാതെ നടക്കുന്നുണ്ടെന്ന് ഉറപ്പാക്കാൻ സാഹചര്യം വീക്ഷിച്ചുവരികയാണെന്നും ഇന്ത്യൻ കോൺസുലേറ്റ് വ്യക്തമാക്കി.