റസൽഖൈമയിൽ പുതിയ സൂപ്പർയാച്ച് മരീന പദ്ധതി പ്രഖ്യാപിച്ചു

റാസൽഖൈമ : റാസൽഖൈമയിൽ നിർമ്മാണം പുരോഗമിക്കുന്ന വിൻ അൽ മർജാൻ ഐലൻഡ് (Wynn Al Marjan Island) സംയോജിത റിസോർട്ട് പദ്ധതിയിൽ 98 ബർത്തുകളുള്ള അത്യാധുനിക സൂപ്പർയാച്ച് മരീന സ്ഥാപിക്കുന്നു. റിസോർട്ടിലേക്ക് കടൽമാർഗ്ഗം നേരിട്ടെത്തുന്ന അതിഥികൾക്കായി ഒരുക്കുന്ന ഈ മരീനയിൽ 85 മീറ്റർ വരെ നീളമുള്ള സൂപ്പർ, മെഗാ യാച്ചുകൾ അടുപ്പിക്കാൻ സാധിക്കും. വൃത്താകൃതിയിലുള്ള പ്രത്യേക ഹാർബർ രൂപകൽപ്പനയോടെ നിർമ്മിക്കുന്ന ഈ കേന്ദ്രം യുഎഇയിലെ ഏത് ഹോട്ടൽ അനുബന്ധ മരീനയേക്കാളും വലിയ യാട്ടുകളെ ഉൾക്കൊള്ളാൻ ശേഷിയുള്ളതായിരിക്കും.
മരീന സമുച്ചയത്തിന്റെ ഹൃദയഭാഗത്തായി നിർമ്മിക്കുന്ന ‘ക്യാപിറ്റനെറി’ (Capitainerie) ഹബ്ബ് വഴി കടൽമാർഗ്ഗമെത്തുന്ന അതിഥികൾക്ക് യാച്ചിൽ വച്ച് തന്നെ ചെക്ക്-ഇൻ പൂർത്തിയാക്കി റിസോർട്ടിലേക്ക് പ്രവേശിക്കാനാകും. ഐജി വൈ മരീനാസ് (IGY Marinas) പങ്കാളിത്തത്തോടെ കൈകാര്യം ചെയ്യുന്ന മരീനയിൽ ഹോട്ടൽ താമസക്കാർക്കായി പ്രത്യേക വാട്ടർഫ്രണ്ട് വിനോദ കേന്ദ്രങ്ങളും സജ്ജീകരിക്കും. 5.7 ബില്യൺ ഡോളർ നിക്ഷേപത്തിൽ നിർമ്മിക്കുന്ന ഈ വൻകിട റിസോർട്ട് പദ്ധതി 2027 സെപ്റ്റംബറോടെ പ്രവർത്തനം ആരംഭിക്കാനാണ് ലക്ഷ്യമിടുന്നത്.