ഫുജൈറ : ഫുജൈറ-ഖോർഫക്കാൻ റോഡിലുണ്ടായ ദാരുണമായ വാഹനാപകടത്തിൽ യു.എ.ഇ സ്വദേശിയായ യുവതിയും (28) ഒരു വയസ്സുള്ള പെൺകുഞ്ഞും മരിച്ചു. അപകടത്തിൽ ഗുരുതരമായി പരിക്കേറ്റ യുവതിയുടെ ഭർത്താവും പരിക്കുകളോടെ രക്ഷപ്പെട്ട മൂന്ന് വയസ്സുള്ള മകളും ആശുപത്രിയിൽ ചികിത്സയിലാണ്. വ്യാഴാഴ്ച ഉച്ചയോടെ ഫൗസ് പെട്രോളിയം പ്രദേശത്തായിരുന്നു സംഭവം.
നിയന്ത്രണം വിട്ട കാർ റോഡരികിൽ നിർത്തിയിട്ടിരുന്ന ട്രക്കിന്റെ പിൻഭാഗത്തേക്ക് ഇടിച്ചു കയറുകയായിരുന്നു. ഡ്രൈവറുടെ ശ്രദ്ധ തിരിഞ്ഞതാണ് പെട്ടെന്ന് വണ്ടി നിയന്ത്രണം വിടാൻ കാരണമെന്നാണ് പ്രാഥമിക നിഗമനം. ഫുജൈറ ഷെയ്ഖ് ഖലീഫ ആശുപത്രിയിലാണ് പരിക്കേറ്റവരെ പ്രവേശിപ്പിച്ചിരിക്കുന്നത്. വാഹനമോടിക്കുമ്പോൾ ഫോൺ ഉപയോഗിക്കുന്നത് ഉൾപ്പെടെയുള്ള ശ്രദ്ധ തിരിക്കുന്ന കാര്യങ്ങളിൽ നിന്ന് വിട്ടുനിൽക്കണമെന്നും നിർത്തിയിട്ടിരിക്കുന്ന വലിയ വാഹനങ്ങളെ സമീപിക്കുമ്പോൾ ജാഗ്രത പാലിക്കണമെന്നും ഫുജൈറ പോലീസ് മുന്നറിയിപ്പ് നൽകി.
22