ദുബായ്: അബുദാബിയിൽ 13 വർഷമായി വസിക്കുന്ന നേപ്പാൾ സ്വദേശിയും യുഎഇ തായ്‌ക്വൊണ്ടോ ഫെഡറേഷൻ റെഫറിയുമായ ജഗൻ അധികാരിക്ക് ഇത്തവണത്തെ ജന്മനാട്ടിലേക്കുള്ള യാത്ര ഒരിക്കലും മറക്കാനാകാത്ത അനുഭവമായി മാറി. ഭാര്യയ്ക്കും രണ്ട് മക്കൾക്കുമൊപ്പം നുവാകോട്ട് ട്രിഷൂലിയിലുള്ള ഭാര്യവീട്ടിലേക്ക് യാത്ര ചെയ്യുന്നതിനിടെ ഓഗസ്റ്റ് 26-നാണ് പ്രളയദുരന്തം രൂക്ഷമായെന്ന വാർത്ത അധികാരിക്ക് ലഭിക്കുന്നത്. തുടർന്ന് ബന്ധുക്കളുടെ വീടും ഭൂമിയും വെള്ളപ്പൊക്കത്തിൽ ഒലിച്ചുപോയ വിവരമറിഞ്ഞതോടെ അവധിക്കാല യാത്ര വഴിതിരിഞ്ഞു. ഫോൺ നെറ്റ്‌വർക്കുകൾ തകരാറിലായതിനെ തുടർന്ന് കുടുങ്ങിപ്പോയവരെ കണ്ടെത്താൻ തുടർച്ചയായ ഫോൺ കോളുകളിലൂടെ വിവരങ്ങൾ കൈമാറുന്ന രക്ഷാപ്രവർത്തനത്തിലേക്ക് അധികാരി തിരിയുകയായിരുന്നു.
നേപ്പാൾ വാർത്താവിനിമയ മന്ത്രിയുടെ പേഴ്‌സണൽ സെക്രട്ടറിയുമായി ബന്ധപ്പെട്ട് ദുരന്തഭൂമിയിൽ കുടുങ്ങിയവരുടെ വിവരങ്ങൾ കൈമാറിയതിനെ തുടർന്ന് നേപ്പാൾ സൈന്യത്തിന്റെ ഹെലികോപ്റ്ററെത്തി നിരവധി പേരെ സുരക്ഷിതസ്ഥാനങ്ങളിലേക്ക് മാറ്റി. അബുദാബി പോലീസിന്റെ ‘വി ആർ ഓൾ പോലീസ്’ വളണ്ടിയർ കൂട്ടായ്മയിൽ നിന്നുള്ള പരിശീലനവും തായ്‌ക്വൊണ്ടോ നൽകിയ കായിക അച്ചടക്കവുമാണ് പ്രതിസന്ധ ഘട്ടത്തിൽ ശാന്തനായി ഇടപെടാൻ സഹായിച്ചതെന്ന് അദ്ദേഹം പറഞ്ഞു. ദുരന്തമുഖത്ത് വീട്ടുപകരണങ്ങളും പണവും തിരികെ എടുക്കാൻ പോയി ജീവൻ അപകടത്തിലാക്കുന്നതിനേക്കാൾ പ്രധാനം മനുഷ്യജീവനാണെന്ന വലിയ പാഠമാണ് ഈ അവധിക്കാലം നൽകിയതെന്നും അദ്ദേഹം കൂട്ടിച്ചേർത്തു.
