ദുബായ്: തൊഴിൽ മേഖലയിൽ പ്രവാസി, സ്വദേശി വനിതകളുടെ പ്രാതിനിധ്യം വർദ്ധിച്ചുവരുന്ന സാഹചര്യത്തിൽ കുടുംബ ജീവിതവും ഔദ്യോഗിക ജീവിതവും സുഗമമായി മുന്നോട്ട് കൊണ്ടുപോകുന്നതിനായി നിർണ്ണായക അഞ്ച് നിർദ്ദേശങ്ങൾ മുന്നോട്ടുവെച്ച് ഫെഡറൽ നാഷണൽ കൗൺസിൽ (FNC). എഫ്എൻസിയുടെ സോഷ്യൽ അഫയേഴ്‌സ്, ലേബർ, പോപ്പുലേഷൻ ആൻഡ് ഹ്യൂമൻ റിസോഴ്‌സസ് സമിതി സമർപ്പിച്ച റിപ്പോർട്ടിലാണ് തൊഴിലെടുക്കുന്ന അമ്മമാർക്ക് ആശ്വാസമാകുന്ന ശുപാർശകൾ ഉൾപ്പെടുത്തിയിരിക്കുന്നത്. ജോലിഭാരവും കുടുംബത്തോടൊപ്പമുള്ള സമയക്കുറവും കാരണം അനുഭവപ്പെടുന്ന മാനസിക സമ്മർദ്ദം കുറയ്ക്കാനും കുടുംബ ഭദ്രത ഉറപ്പാക്കാനുമാണ് പുതിയ നയരൂപീകരണത്തിലൂടെ ലക്ഷ്യമിടുന്നത്.
പൊതുമേഖലയിലെ പ്രസവാവധി പൂർണ്ണ ശമ്പളത്തോടെ 98 ദിവസമായി ദീർഘിപ്പിക്കുക, ഫ്ലെക്സിബിൾ അല്ലെങ്കിൽ വർക്ക് ഫ്രം ഹോം രീതികൾക്കായി ഏകോപിപ്പിച്ച ദേശീയ മാനദണ്ഡങ്ങൾ നിശ്ചയിക്കുക എന്നിവയാണ് പ്രധാന നിർദ്ദേശങ്ങൾ. 12 വയസ്സിൽ താഴെയുള്ള കുട്ടികളുടെ അമ്മമാർ, ഗർഭിണികൾ, നിശ്ചയദാർഢ്യമുള്ളവർ എന്നിവർക്ക് ജോലിയിൽ പ്രത്യേക മുൻഗണന നൽകാനും നിർദ്ദേശമുണ്ട്. കൂടാതെ സ്ഥാപനങ്ങളിൽ നഴ്‌സറികൾ നിർബന്ധമാക്കുക, സ്വകാര്യ മേഖലയിലെ സ്ഥാപനങ്ങളെ കുടുംബ സൗഹൃദ നയങ്ങൾ നടപ്പിലാക്കാൻ പ്രോത്സാഹിപ്പിക്കുന്നതിനായി നികുതി ഇളവുകളും മുൻഗണനകളും നൽകുന്ന പുതിയ ദേശീയ പദ്ധതി ആരംഭിക്കുക എന്നീ ശുപാർശകളും പാർലമെന്ററി റിപ്പോർട്ട് മുന്നോട്ടുവെക്കുന്നു.
12