ദുബായ്: യുഎഇയിലെ യൂണിവേഴ്സിറ്റി വിദ്യാർത്ഥികൾക്ക് പഠനത്തിലും ഗവേഷണങ്ങളിലും നിർമ്മിത ബുദ്ധി (AI) പ്രയോജനപ്പെടുത്തുന്നതിനായി ‘ഗൂഗിൾ എഐ പ്ലസ്’ (Google AI Plus) പ്ലാൻ ഒരു വർഷത്തേക്ക് സൗജന്യമായി ലഭ്യമാക്കുന്നു. യുഎഇ ഗവൺമെന്റ് ആർട്ടിഫിഷ്യൽ ഇന്റലിജൻസ് ഓഫീസും ഗൂഗിളും ചേർന്നാണ് ഈ പദ്ധതി പ്രഖ്യാപിച്ചത്. വിദ്യാർത്ഥികളുടെ അക്കാദമിക് കഴിവുകൾ വികസിപ്പിക്കാനും ഭാവിയിലെ ഡിജിറ്റൽ ആവശ്യങ്ങൾക്ക് അനുയോജ്യമായി യുവതലമുറയെ സജ്ജമാക്കാനും ലക്ഷ്യമിട്ടാണ് ഈ നീക്കം.
ഈ പദ്ധതിയിലൂടെ വിദ്യാർത്ഥികൾക്ക് ജെമിനി (Gemini) ആപ്പ്, അഡ്വാൻസ്ഡ് സെർച്ച് സാങ്കേതികവിദ്യകൾ, പഠന സാമഗ്രികൾ ചുരുക്കി തയാറാക്കുന്നതിനുള്ള ടൂളുകൾ, ഇമേജ്-വീഡിയോ നിർമ്മാണ ടൂളുകൾ, ജെമിനി നോട്ട്ബുക്ക് (Gemini Notebook) എന്നിവയോടൊപ്പം 400 ജിബി (400GB) സ്റ്റോറേജും സൗജന്യമായി ലഭിക്കും. യുഎഇയിൽ പഠിക്കുന്ന 18 വയസ്സിന് മുകളിലുള്ള യൂണിവേഴ്സിറ്റി വിദ്യാർത്ഥികൾക്ക് ഡിസംബർ 31-നകം google/studentoffer26-uae എന്ന ലിങ്ക് വഴി ഈ സേവനത്തിനായി രജിസ്റ്റർ ചെയ്യാവുന്നതാണ്. കൂടാതെ, എഐ ടൂളുകൾ ഫലപ്രദമായും ഉത്തരവാദിത്തത്തോടെയും ഉപയോഗിക്കാൻ സഹായിക്കുന്ന പരിശീലന പരിപാടികളും വിദ്യാർത്ഥികൾക്കായി സംഘടിപ്പിക്കും.