ദുബായ്: ഡിജിറ്റൽ പരിവർത്തനത്തിന്റെ ഭാഗമായി ഭരണപരവും പ്രവർത്തനപരവുമായ ചുമതലകൾക്കായി 36 റോബോട്ടുകളെ വിന്യസിച്ച് ദുബായ് പോലീസ്. സേവനങ്ങൾ കൂടുതൽ കാര്യക്ഷമമാക്കാനും നടപടിക്രമങ്ങൾ വേഗത്തിലാക്കാനും എഐ സാങ്കേതികവിദ്യ പ്രയോജനപ്പെടുത്തുന്നതിന്റെ ഭാഗമായാണ് നടപടി. ദുബായ് പോലീസ് കമാൻഡർ ഇൻ ചീഫ് ലെഫ്റ്റനന്റ് ജനറൽ അബ്ദുള്ള ഖലീഫ അൽ മർറിയുടെ വാർഷിക അവലോകന യോഗത്തിലാണ് കഴിഞ്ഞ ഒരു വർഷത്തിനിടെ പൂർത്തിയാക്കിയ 104 സാങ്കേതിക പദ്ധതികളുടെയും ഡിജിറ്റൽ നവീകരണത്തിന്റെയും വിവരങ്ങൾ വ്യക്തമാക്കിയത്.
റോബോട്ടുകളുടെ വിന്യാസത്തിലൂടെ ജീവനക്കാരുടെ ജോലിഭാരം കുറയ്ക്കാനും സങ്കീർണ്ണമായ മറ്റ് മേഖലകളിൽ കൂടുതൽ ശ്രദ്ധ കേന്ദ്രീകരിക്കാനും സാധിക്കുന്നുണ്ടെന്ന് ദുബായ് പോലീസ് അറിയിച്ചു. ജനങ്ങൾക്കുള്ള ഡിജിറ്റൽ സേവനങ്ങളുടെ തുടർച്ചയിൽ 99.97 ശതമാനവും സിസ്റ്റം പ്രവർത്തനങ്ങളിൽ 99.92 ശതമാനവും കൃത്യത നിലനിർത്താൻ സേനയ്ക്ക് സാധിച്ചിട്ടുണ്ട്. സ്മാർട്ട് പോലീസ് സ്റ്റേഷനുകളിലെ (SPS) സ്മാർട്ട് അസിസ്റ്റന്റ്, വിവര ശേഖരണത്തിനായുള്ള എഐ പ്ലാറ്റ്‌ഫോമുകൾ എന്നിവ വഴി ഭാവി സുരക്ഷാ വെല്ലുവിളികളെ നേരിടാൻ സജ്ജമായ അത്യാധുനിക സംവിധാനങ്ങളാണ് ദുബായ് പോലീസ് ഒരുക്കിയിരിക്കുന്നത്.
