ദുബായ്: ദുബായിയുടെ മൊത്തം വിസ്തൃതിയുടെ അഞ്ച് ശതമാനത്തോളം (225 ചതുരശ്ര കിലോമീറ്റർ) വ്യാപിച്ചുകിടക്കുന്ന ദുബായ് ഡെസേർട്ട് കൺസർവേഷൻ റിസർവ് (DDCR) മരുഭൂമിയിലെ ജൈവവൈവിധ്യവും പ്രകൃതി പൈതൃകവും സംരക്ഷിക്കുന്നതിൽ മുൻപന്തിയിലാണെന്ന് ഔദ്യോഗിക റിപ്പോർട്ട്. യുഎഇയിലെ ആദ്യത്തെ നാഷണൽ റിസർവും ദുബായിലെ രണ്ടാമത്തെ വലിയ പ്രകൃതി സംരക്ഷണ കേന്ദ്രവുമായ ഇവിടെ 562 വൈവിധ്യമാർന്ന ജീവിവർഗ്ഗങ്ങളാണ് ഉള്ളത്. ഇതിൽ 142 ഇനം പക്ഷികൾ, 22 ഇനം സസ്തനികൾ, 28 ഇനം ഉരഗങ്ങൾ, 298 ഇനം കശേരുക്കളില്ലാത്ത ജീവികൾ, 72 ഇനം സസ്യങ്ങൾ എന്നിവ ഉൾപ്പെടുന്നു.
അറേബ്യൻ ഓർക്കിസ് (Arabian Oryx), അറേബ്യൻ സാൻഡ് ഗസൽ, മൗണ്ടൻ ഗസൽ, ഹൂബാറ പക്ഷികൾ, ഗോർഡൻസ് വൈൽഡ് ക്യാറ്റ് തുടങ്ങി മേഖലയിൽ വംശനാശഭീഷണി നേരിടുന്ന നിരവധിയായ അപൂർവ്വ ജീവികൾക്ക് റിസർവ് സുരക്ഷിതമായ വാസസ്ഥലമൊരുക്കുന്നു. ദുബായ് എൻവയോൺമെന്റ് ആൻഡ് ക്ലൈമറ്റ് ചേഞ്ച് അതോറിറ്റിയുടെ (DECCA) നേതൃത്വത്തിൽ ശാസ്ത്രീയ നിരീക്ഷണങ്ങളും പ്രജനന പദ്ധതികളും വഴി ജീവികളുടെ എണ്ണം വർദ്ധിപ്പിക്കാനുള്ള നടപടികൾ ഊർജ്ജിതമായി പുരോഗമിക്കുകയാണ്. പരിസ്ഥിതി സൗഹൃദ വിനോദസഞ്ചാരത്തിന് (Ecotourism) പ്രാധാന്യം നൽകുന്ന ഈ കേന്ദ്രം വരുംതലമുറകൾക്കായി യുഎഇയുടെ മരുഭൂ പൈതൃകം കാത്തുസൂക്ഷിക്കുന്നതിൽ വലിയ പങ്കാണ് വഹിക്കുന്നത്.