Raneesha Razak

അബുദാബി : അബുദാബിയിൽ വേട്ടയാടൽ ഏർപ്പെടുന്നതിന് കർശനമായ പരിസ്ഥിതി, നിയമ നിയന്ത്രണങ്ങൾ നിർബന്ധമാക്കി എൻവയോൺമെന്റ് ഏജൻസി അബുദാബി (EAD). പരമ്പരാഗത വേട്ടയാടൽ രീതിയായ ഫാൽക്കണറി (Falconry) മുതൽ നിയന്ത്രിത റിസർവുകളിലെ തോക്ക് ഉപയോഗിച്ചുള്ള വേട്ടയാടൽ വരെ വ്യക്തമായ നിയമങ്ങൾക്കും ലൈസൻസുകൾക്കും വിധേയമാണ്. 2026-27 പരമ്പരാഗത വേട്ടയാടൽ സീസൺ ഒക്ടോബർ 20 മുതൽ 2027 ഫെബ്രുവരി 15 വരെയാണ് നടക്കുന്നത്.
താം (TAMM) പോർട്ടൽ വഴി അപേക്ഷിക്കാവുന്ന ഫാൽക്കണറി ലൈസൻസ് 18 വയസ്സിന് മുകളിലുള്ള യുഎഇ പൗരന്മാർക്കാണ് ലഭിക്കുക. ഇതിനായി 127 ദിർഹമാണ് ഫീസ് ഈടാക്കുന്നത്. വേട്ടയാടലിൽ വന്യജീവികളെ പിടികൂടുന്നത് പൂർണ്ണമായും നിരോധിച്ചിട്ടുള്ളതിനാൽ കൃത്രിമമായി വളർത്തുന്ന ഹൂബറ (Captive-bred Houbara) പക്ഷികളെ മാത്രമേ വേട്ടയാടാൻ അനുമതിയുള്ളൂ. പ്രധാന റോഡുകൾ, റസിഡൻഷ്യൽ മേഖലകൾ, സൈനിക-എണ്ണ കേന്ദ്രങ്ങൾ, സംരക്ഷിത വനങ്ങൾ എന്നിവയിൽ നിന്ന് കുറഞ്ഞത് രണ്ട് കിലോമീറ്റർ അകലെയുള്ള മരുഭൂ പ്രദേശങ്ങളിൽ സൂര്യോദയം മുതൽ സൂര്യാസ്തമയം വരെ മാത്രമാണ് വേട്ടയാടാൻ അനുമതിയുള്ളത്.

വ്യക്തിഗത തോക്കുകൾ ഉപയോഗിച്ച് സ്വതന്ത്രമായി മരുഭൂമിയിൽ വേട്ടയാടാൻ അനുവാദമില്ല. എന്നാൽ തെലാൽ റിസോർട്ടിലെ ബരാരി ഹണ്ടിംഗ് സെന്റർ പോലുള്ള അംഗീകൃത റിസർവുകളിൽ സ്ഥാപനത്തിന്റെ തന്നെ ആയുധങ്ങളും മേൽനോട്ടവും ഉപയോഗിച്ച് കൃത്രിമമായി വളർത്തുന്ന ഓറിക്സ്, റീം ഗസൽ തുടങ്ങിയ മൃഗങ്ങളെ വേട്ടയാടാവുന്നതാണ്. കൂടാതെ അൽ ദഫ്രയിലെ അൽ മർസൂം റിസർവിൽ തോക്കുകളില്ലാതെ ഫാൽക്കണുകളും സലൂക്കി നായ്ക്കളും ഉപയോഗിച്ചുള്ള സാംസ്കാരിക വേട്ടയാടൽ അനുഭവങ്ങളും ലഭ്യമാണ്.