ദുബായ് : യുഎഇയിൽ സ്വന്തമായി ബിസിനസ്സ് ആരംഭിക്കാനും വളർത്താനും ആഗ്രഹിക്കുന്ന വനിതാ സംരംഭകർക്ക് വൻ ആനുകൂല്യങ്ങളുമായി പ്രമുഖ ബാങ്കായ റാക്ബാങ്ക് (RAKBANK). ബാങ്കിന്റെ ‘ഷീ മീൻസ് ബിസിനസ്സ്’ (She Means Business) എന്ന പുതിയ പദ്ധതിയിലൂടെ വനിതകൾ നയിക്കുന്ന കമ്പനികൾക്ക് ഒരു വർഷത്തേക്ക് (12 മാസം) അക്കൗണ്ട് മെയിന്റനൻസ് ഫീസ് പൂർണ്ണമായും ഒഴിവാക്കി നൽകും. 2026 ഡിസംബർ 10-ന് മുൻപായി ബിസിനസ്സ് അക്കൗണ്ട് തുറന്ന് സജീവമാക്കുന്ന വനിതാ സംരംഭകർക്കാണ് ഈ ആനുകൂല്യം ലഭിക്കുക.
തുടക്കക്കാർക്കായി മിനിമം ബാലൻസ് ആവശ്യമില്ലാത്ത സീറോ ബാലൻസ് ബിസിനസ്സ് അക്കൗണ്ടാണ് ബാങ്ക് വാഗ്ദാനം ചെയ്യുന്നത്. ഇസ്ലാമിക്, കൺവെൻഷണൽ രീതികളിൽ ലഭ്യമാകുന്ന ഈ മൾട്ടി-കറൻസി അക്കൗണ്ട് വഴി യുഎഇ ദിർഹം, യുഎസ് ഡോളർ, ജിബിപി, യൂറോ എന്നീ കറൻസികളിൽ ഇടപാടുകൾ നടത്താം. ഡിജിറ്റൽ സംവിധാനത്തിലൂടെ വെറും 4 മുതൽ 48 മണിക്കൂറിനുള്ളിൽ അക്കൗണ്ട് തുറക്കാൻ സാധിക്കും. കൂടാതെ, അക്കൗണ്ടിലെ തുകയ്ക്ക് 2 ശതമാനം വരെ പലിശ നിരക്കും, സൌജന്യ ഡെബിറ്റ് കാർഡും ചെക്ക് ബുക്കും ലഭിക്കും. പ്രതിമാസം 4 അന്താരാഷ്ട്ര പണമിടപാടുകൾ സൌജന്യമായി ചെയ്യാമെന്നതും എടുത്തുപറയേണ്ട പ്രത്യേകതയാണ്.
ഇടപാടുകൾക്ക് പുറമെ ഒരു മില്യൺ ദിർഹം വരെയുള്ള ഇൻഷുറൻസ് പരിരക്ഷയും, ജീവനക്കാരുടെ ശമ്പള വിതരണത്തിനുള്ള സോഫ്റ്റ്വെയർ സൗകര്യങ്ങളും ബാങ്ക് ഒരുക്കുന്നുണ്ട്. മിഡിൽ ഈസ്റ്റിലെ വനിതാ കൂട്ടായ്മയായ ‘ക്രഞ്ച്മോംസ്’ (CrunchMoms) എന്ന നെറ്റ്വർക്കുമായി സഹകരിച്ച് ബിസിനസ്സ് പരിശീലനങ്ങളും അംഗത്വ ഫീസിൽ 1500 ദിർഹത്തിന്റെ ഇളവും ബാങ്ക് വനിതകൾക്കായി നൽകുന്നുണ്ട്. എഐ (AI), ലീഡർഷിപ്പ്, മാർക്കറ്റിംഗ്, ക്യാഷ് ഫ്ലോ മാനേജ്മെന്റ് തുടങ്ങിയ മേഖലകളിൽ ഇവർക്ക് പ്രത്യേക പരിശീലനവും ലഭിക്കും. പുതിയ കമ്പനികളുടെ പ്രവർത്തനച്ചെലവ് കുറയ്ക്കുന്നതിനാണ് ബാങ്ക് ഈ പദ്ധതി അവതരിപ്പിച്ചിരിക്കുന്നത്.
