ദുബായ് : അറബ് മീഡിയ സമ്മിറ്റ് 2026-ൽ സിനിമാ, ഗെയിമിംഗ് മേഖലകൾക്ക് പ്രത്യേക പ്രാധാന്യം നൽകാൻ ദുബായ് മീഡിയ കൗൺസിൽ തീരുമാനിച്ചു. സെപ്റ്റംബർ 15 മുതൽ 17 വരെ ദുബായ് ഭരണാധികാരി ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ രക്ഷാകർതൃത്വത്തിൽ നടക്കുന്ന ഉച്ചകോടിയിൽ ദുബായ് ഫിലിംസ് ആൻഡ് ഗെയിംസ് കമ്മീഷന്റെ നേതൃത്വത്തിൽ രണ്ട് പ്രത്യേക ഫോറങ്ങൾ സംഘടിപ്പിക്കും. പ്രാദേശിക, ആഗോള തലത്തിലെ പ്രസാധകർ, നിക്ഷേപകർ, സ്രഷ്ടാക്കൾ എന്നിവരെ ഒരുമിപ്പിച്ച് സിനിമാ-ഗെയിമിംഗ് മേഖലകളിൽ അധിഷ്ഠിതമായ ഒരു സർഗ്ഗാത്മക സാമ്പത്തിക വ്യവസ്ഥ സൃഷ്ടിക്കുകയാണ് ദുബായ് ഇതിലൂടെ ലക്ഷ്യമിടുന്നത്.
ഗെയിംസ് ഫോറം നിക്ഷേപങ്ങൾ, വളർച്ചാ സാദ്ധ്യതകൾ, പുതിയ സാങ്കേതികവിദ്യകൾ എന്നിവയെക്കുറിച്ച് ചർച്ച ചെയ്യുമ്പോൾ, ഫിലിംസ് ഫോറം നിർമ്മാണം, സഹനിർമ്മാണം, നിർമ്മിത ബുദ്ധി (AI) എന്നിവ സിനിമാ നിർമ്മാണത്തിൽ വരുത്തുന്ന മാറ്റങ്ങളെക്കുറിച്ച് കേന്ദ്രീകരിക്കും. ആഗോള മാധ്യമ രംഗത്തെ 10,000-ത്തിലധികം പ്രമുഖരും 400-ലധികം പ്രഭാഷകരും പങ്കാളികളാകുന്ന ഉച്ചകോടിയിൽ 175-ലേറെ ചർച്ചാ സെഷനുകൾ അരങ്ങേറും. വേഗതയേറിയ സേവനങ്ങളും ലോകോത്തര അടിസ്ഥാന സൗകര്യങ്ങളും ലഭ്യമാക്കിക്കൊണ്ട് സർഗ്ഗാത്മക ആശയങ്ങൾക്ക് ആഗോള വിപണിയിലേക്ക് ഏറ്റവും എളുപ്പമുള്ള വഴി തുറന്നുകൊടുക്കുകയാണ് ദുബായിയുടെ ലക്ഷ്യമെന്ന് അധികൃതർ വ്യക്തമാക്കി.
15