ദുബായ് : പ്രാരംഭ ഘട്ടത്തിൽ യാതൊരുവിധ ലക്ഷണങ്ങളും കാണിക്കാതെ വൃക്കകളെ ഗുരുതരമായി ബാധിക്കുന്ന വിട്ടുമാറാത്ത വൃക്കരോഗങ്ങൾ (Chronic Kidney Disease) യുഎഇയിൽ വർദ്ധിച്ചുവരുന്നതായി ആരോഗ്യ വിദഗ്ധരുടെ മുന്നറിയിപ്പ്. രോഗം വൻതോതിൽ പ്രകടനമാകുന്ന ഘട്ടത്തിൽ മാത്രമാണ് പലരും ചികിത്സയ്ക്കായി ആശുപത്രികളിൽ എത്തുന്നതെന്ന് ആസ്റ്റർ മൻഖൂൾ ആശുപത്രിയിലെ നെഫ്രോളജിസ്റ്റ് ഡോ. ജോൺ ചെറിയാനും ബുർജീൽ മെഡിക്കൽ സിറ്റിയിലെ ട്രാൻസ്പ്ലാന്റ് വിഭാഗം വിദഗ്ധൻ ഡോ. ഉമർ മഖ്ബൂലും വ്യക്തമാക്കി.
പ്രധാനമായും ടൈപ്പ്-2 പ്രമേഹം, ഉയർന്ന രക്തസമ്മർദ്ദം (Hypertension), അമിതവണ്ണം എന്നിവയുള്ളവരിലാണ് വൃക്കരോഗ സാധ്യത കൂടുതൽ. മുൻകാലങ്ങളിൽ പ്രായമായവരിലാണ് ഈ രോഗം കണ്ടിരുന്നതെങ്കിൽ, നിലവിൽ ജീവിതശൈലിയിലെ മാറ്റങ്ങൾ കാരണം ചെറുപ്പക്കാരിലും ഇത് വ്യാപകമായി കണ്ടുവരുന്നുണ്ട്. മൂത്രത്തിൽ പത വരിക, ശരീരത്തിലോ മുഖത്തോ വീക്കം ഉണ്ടാവുക, മൂത്രത്തിൽ രക്തത്തിന്റെ അംശം കാണുക, തളർച്ച, ശ്വാസംമുട്ടൽ എന്നിവയാണ് പ്രധാന ലക്ഷണങ്ങൾ.
രോഗം നേരത്തെ തിരിച്ചറിയാൻ GFR (Glomerular Filtration Rate), അൽബുമിൻ-ക്രിയേറ്റിനിൻ അനുപാതം പരിശോധിക്കുന്ന Urine ACR എന്നീ രണ്ട് ലളിതമായ പരിശോധനകൾ നടത്താമെന്ന് ഡോക്ടർമാർ നിർദ്ദേശിക്കുന്നു. സ്വയം ചികിത്സയും പെയിൻ കില്ലറുകളുടെ അമിത ഉപയോഗവും ഒഴിവാക്കി കൃത്യമായ ഇടവേളകളിൽ പരിശോധനകൾ നടത്തുന്നത് ഡയാലിസിസ് അല്ലെങ്കിൽ വൃക്ക മാറ്റിവെക്കൽ വരെയുള്ള അവസ്ഥ തടയാൻ സഹായിക്കും.
