ദുബായ് : ജിയോസ്പേഷ്യൽ സർവേകൾ നടത്തുന്നതിനായി ദുബായ് മുനിസിപ്പാലിറ്റി അത്യാധുനിക സ്മാർട്ട് റോബോട്ട് രംഗത്തിറക്കി. ലൈഡാർ (LiDAR) സാങ്കേതികവിദ്യയും സ്മാർട്ട് ക്യാമറകളും ഉപയോഗിച്ച് മനുഷ്യന്റെ ഇടപെടലുകൾ പരമാവധി കുറച്ചുകൊണ്ട് കൃത്യമായ ലൊക്കേഷൻ ഡാറ്റ ശേഖരിക്കാൻ ഈ റോബോട്ടിന് സാധിക്കും.
കൃത്യമായ കോർഡിനേറ്റുകൾ, പനോരമിക് ചിത്രങ്ങൾ, വീഡിയോകൾ, ത്രിമാന ഡാറ്റ (3D data) എന്നിവ തുടർച്ചയായി ശേഖരിക്കാൻ ഈ സംവിധാനത്തിന് കഴിയും. ദുബായുടെ സ്പേഷ്യൽ ഡാറ്റാബേസുകൾ എപ്പോഴും പുതുതായി സൂക്ഷിക്കുന്നതിനും അടിസ്ഥാന സൗകര്യ വികസന പദ്ധതികൾ, അസറ്റ് മാനേജ്‌മെന്റ്, നഗരാസൂത്രണം, സർക്കാർ തലത്തിലുള്ള തീരുമാനങ്ങൾ എന്നിവയ്ക്ക് പിന്തുണ നൽകുന്നതിനും ഈ വിവരങ്ങൾ ഉപയോഗപ്പെടുത്തും.
അപകടസാധ്യതയുള്ളതും മനുഷ്യർക്ക് പ്രവേശിക്കാൻ ബുദ്ധിമുട്ടുള്ളതുമായ സ്ഥലങ്ങളിൽ സർവേ ജോലികൾ സുരക്ഷിതമായും കൂടുതൽ കാര്യക്ഷമമായും നിർവഹിക്കാൻ പുതിയ സാങ്കേതികവിദ്യ സഹായിക്കുമെന്ന് മുനിസിപ്പാലിറ്റി വ്യക്തമാക്കി.