അബുദാബി : യുഎഇയുടെ ദേശീയ റെയിൽ ശൃംഖലയായ ഇത്തിഹാദ് റെയിലിൽ യാത്ര ചെയ്യുന്ന യാത്രക്കാരുടെ അവകാശങ്ങളും ടിക്കറ്റ് റദ്ദാക്കൽ, റീഫണ്ട് തുടങ്ങിയവ സംബന്ധിച്ച നിബന്ധനകളും ഉൾപ്പെടുത്തി പാസഞ്ചർ ചാർട്ടർ പുറപ്പെടുവിച്ചു. സ്വന്തം വീഴ്ച മൂലമോ വൈകിയെത്തുന്നതുകൊണ്ടോ ട്രെയിൻ നഷ്ടമായാൽ യാത്രക്കാർക്ക് ടിക്കറ്റ് തുക തിരികെ ലഭിക്കുകയോ നഷ്ടപരിഹാരം നൽകുകയോ ചെയ്യില്ലെന്ന് ഇത്തിഹാദ് റെയിൽ വ്യക്തമാക്കി.
ട്രെയിൻ പുറപ്പെടുന്നതിന് കുറഞ്ഞത് 20 മിനിറ്റ് മുമ്പെങ്കിലും യാത്രക്കാർ സ്റ്റേഷനിൽ എത്തുവാൻ നിർദ്ദേശമുണ്ട്. പുറപ്പെടുന്നതിന് രണ്ട് മിനിറ്റ് മുമ്പ് ബോർഡിംഗ് ഗേറ്റുകൾ അടയ്ക്കുന്നതിനാൽ അതിനുശേഷമെത്തുന്നവർക്ക് പ്ലാറ്റ്‌ഫോമിലേക്ക് പ്രവേശനം അനുവദിക്കില്ല. ടിക്കറ്റ് റദ്ദാക്കാതെ യാത്ര ചെയ്യാതിരുന്നാൽ അത് ‘നോ ഷോ’ ആയി കണക്കാക്കുകയും ടിക്കറ്റിന്റെ സാധുത നഷ്ടപ്പെടുകയും ചെയ്യും.
അതേസമയം, ട്രെയിൻ 30 മിനിറ്റോ അതിൽ കൂടുതലോ വൈകുകയാണെങ്കിൽ യാത്ര വേണ്ടെന്നുവെക്കാനും മുഴുവൻ തുകയും റീഫണ്ടായി വാങ്ങാനും അല്ലെങ്കിൽ മറ്റൊരു സമയത്തേക്ക് സൗജന്യമായി ടിക്കറ്റ് മാറ്റാനും യാത്രക്കാർക്ക് അവകാശമുണ്ട്. ട്രെയിൻ റദ്ദാക്കുകയാണെങ്കിൽ ബദൽ യാത്രയോ മറ്റൊരു ഗതാഗത സൗകര്യമോ ഉറപ്പാക്കും. എന്നാൽ ദുബായ് മെട്രോ, ടാക്സി, ബസ് തുടങ്ങിയ മറ്റ് ട്രാൻസിറ്റ് സേവനങ്ങളുമായി ബന്ധപ്പെട്ടുണ്ടാകുന്ന വൈകലുകൾക്ക് കമ്പനി ഉത്തരവാദിയായിരിക്കില്ല.
13