അൽ ഐൻ : അൽ ഐൻ സിറ്റി മുനിസിപ്പാലിറ്റി അൽ റീഫ് പ്രദേശത്ത് 1,19,000 ചതുരശ്ര മീറ്ററിലധികം വിസ്തൃതിയുള്ള ‘അൽ റീഫ് പാർക്ക്’ പ്രൊജക്റ്റ് പൂർത്തിയാക്കി പൊതുജനങ്ങൾക്കായി തുറന്നുകൊടുത്തു. അബു അസീറ ബിൻ അൽ ഹാരിത് സ്ട്രീറ്റിൽ സ്ഥിതി ചെയ്യുന്ന ഈ പാർക്ക്, എല്ലാ പ്രായത്തിലുമുള്ള ആളുകൾക്കും കായിക-വിനോദ സൗകര്യങ്ങൾ പ്രദാനം ചെയ്യുന്ന രീതിയിലാണ് രൂപകൽപ്പന ചെയ്തിരിക്കുന്നത്.
പാർക്കിൽ രണ്ട് മൾട്ടി പർപ്പസ് കോർട്ടുകൾ, ഒരു ഫുട്ബോൾ പിച്ച്, ഒരു വോളിബോൾ കോർട്ട് എന്നിവയുൾപ്പെടെ നാല് കായിക കോർട്ടുകൾ സജ്ജീകരിച്ചിട്ടുണ്ടെന്ന് അൽ ഐൻ സിറ്റി മുനിസിപ്പാലിറ്റി പ്രൊജക്റ്റ് ഇംപ്ലിമെന്റേഷൻ ഡയറക്ടർ സാലിഹ് അൽ അരിയാനി പറഞ്ഞു. കൂടാതെ കുട്ടികൾക്കായുള്ള രണ്ട് കളിസ്ഥലങ്ങളും ഏഴ് ഫിറ്റ്നസ് സോണുകളും ഇവിടെയുണ്ട്.
കുട്ടികൾക്കും മുതിർന്നവർക്കുമായി പ്രത്യേക സൈക്ലിംഗ് ട്രാക്കുകളും താമസക്കാർക്കും സന്ദർശകർക്കുമായി 1.4 കിലോമീറ്റർ നീളമുള്ള വാക്കിംഗ് ട്രാക്കും പാർക്കിൽ ഒരുക്കിയിട്ടുണ്ട്. കമ്മ്യൂണിറ്റി ഇവന്റുകൾ നടത്താനുള്ള തിയേറ്റർ, തണലുള്ള 10 ഇരിപ്പിടങ്ങൾ, ഒരു റിസപ്ഷൻ സെന്റർ, കഫേ, പ്രാർത്ഥനാ മുറികൾ, പൊതു ശൗചാലയങ്ങൾ എന്നിവയും പാർക്കിൽ ഉൾപ്പെടുത്തിയിട്ടുണ്ട്.