ദുബായ് : നവജാതശിശുക്കളുടെ ജനനസർട്ടിഫിക്കറ്റ് വേഗത്തിലും എളുപ്പത്തിലും ലഭ്യമാക്കുന്നതിനായി എമിറേറ്റ്സ് ഹെൽത്ത് സർവീസസ് (ഇഎച്ച്എസ്) ഡിജിറ്റൽ സേവനം കൂടുതൽ കാര്യക്ഷമമാക്കി. സ്വദേശികൾക്കും വിദേശികൾക്കും ഒരുപോലെ പ്രയോജനപ്പെടുത്താവുന്ന ഈ സംവിധാനത്തിലൂടെ അപേക്ഷ പൂർത്തിയാക്കുന്ന മുറയ്ക്ക് തന്നെ ജനനസർട്ടിഫിക്കറ്റ് ഉടനടി ലഭിക്കും. മാതാപിതാക്കളുടെ സാധുവായ എമിറേറ്റ്സ് ഐഡി വിവരങ്ങൾ നൽകി ഇഎച്ച്എസിന്റെ ഔദ്യോഗിക വെബ്സൈറ്റ് വഴിയോ സ്മാർട്ട് ആപ്ലിക്കേഷൻ വഴിയോ മിനിറ്റുകൾക്കുള്ളിൽ അപേക്ഷിക്കാം. മാതാപിതാക്കൾക്ക് പുറമെ പവർ ഓഫ് അറ്റോർണി കൈവശമുള്ള നിയമപ്രതിനിധികൾക്കും അപേക്ഷ സമർപ്പിക്കാൻ സാധിക്കും. സർട്ടിഫിക്കറ്റ് നൽകുന്നതിനായി 65 ദിർഹമാണ് ഫീസ്. സർട്ടിഫിക്കറ്റിന്റെ കോപ്പി വീട്ടുപടിക്കൽ എത്തിച്ചുനൽകുന്ന കൊറിയർ സേവനം ആവശ്യമുള്ളവർക്ക് ഐച്ഛികമായി 20.75 ദിർഹം കൂടി നൽകി അത് തിരഞ്ഞെടുക്കാവുന്നതാണ്. പ്രസവാനന്തരമുള്ള ആദ്യ ഔദ്യോഗിക രേഖ തയ്യാറാക്കുന്നതിനുള്ള സമയലാഭം ഉറപ്പാക്കാനും സർക്കാരുമായി ബന്ധപ്പെട്ട സേവനങ്ങൾ കൂടുതൽ എളുപ്പത്തിൽ പൊതുജനങ്ങൾക്ക് എത്തിക്കാനുമാണ് ഡിജിറ്റൽ പ്ലാറ്റ്ഫോമിലൂടെ ഇത്തരമൊരു സംവിധാനം ഒരുക്കിയിട്ടുള്ളതെന്ന് എമിറേറ്റ്സ് ഹെൽത്ത് സർവീസസ് വ്യക്തമാക്കി.
4