ലോക പൈതൃക പദവിയിലേക്ക് ഫുജൈറയുടെ വാദി വുറയ്യ

ഫുജൈറ : ഫുജൈറയിലെ പ്രശസ്തമായ വാദി വുറയ്യ (Wadi Wurayah) ദേശീയോദ്യാനത്തെ യുനെസ്കോയുടെ (UNESCO) ലോക പൈതൃക പട്ടികയിൽ ഉൾപ്പെടുത്തുന്നതിനുള്ള പ്രവർത്തനങ്ങൾ യുഎഇ ഊർജ്ജിതമാക്കി. റിപ്പബ്ലിക് ഓഫ് കൊറിയയിലെ ബുസാനിൽ നടക്കുന്ന യുനെസ്കോ ലോക പൈതൃക സമിതിയുടെ 48-ാമത് സമ്മേളനത്തിൽ യുഎഇ സാംസ്കാരിക മന്ത്രാലയവും ഫുജൈറ ഗവൺമെന്റും അടങ്ങുന്ന പ്രതിനിധി സംഘം പങ്കെടുക്കുന്നുണ്ട്. സമിതിയുടെ വിലയിരുത്തലിനായി വാദി വുറയ്യയുടെ നാമനിർദ്ദേശ പത്രിക ഔദ്യോഗികമായി സമർപ്പിച്ചു.
ഹാജർ മലനിരകളിൽ സ്ഥിതി ചെയ്യുന്ന 220 ചതുരശ്ര കിലോമീറ്റർ വിസ്തൃതിയുള്ള വാദി വുറയ്യ, അപൂർവ്വ ജീവജാലങ്ങളാലും നീരുറവകളാലും സമൃദ്ധമായ പ്രദേശമാണ്. 1,099-ലധികം ജീവിവർഗ്ഗങ്ങളും അപൂർവ്വ സസ്യങ്ങളും അധിവസിക്കുന്ന ഈ പ്രകൃതിസങ്കേതം മേഖലയിലെ തന്നെ ഏറ്റവും പ്രധാനപ്പെട്ട ജൈവവൈവിധ്യ കേന്ദ്രങ്ങളിലൊന്നായി കണക്കാക്കപ്പെടുന്നു. ആഗോളതലത്തിൽ വാദി വുറയ്യയ്ക്ക് അംഗീകാരം ലഭിക്കുന്നത് പരിസ്ഥിതി സംരക്ഷണ രംഗത്ത് യുഎഇയുടെ നാഴികക്കല്ലായി മാറും.