ദുബായ് : സ്ഥാപന മികവിലും ഭരണനിർവ്വഹണ മാനദണ്ഡങ്ങൾ (Governance Standards) കൃത്യമായി നടപ്പിലാക്കുന്നതിലും അന്താരാഷ്ട്ര അംഗീകാരം നേടി ദുബായ് മുൻസിപ്പാലിറ്റി പുതിയ ലോക റെക്കോർഡ് സ്വന്തമാക്കി. ‘ഒഫീഷ്യൽ വേൾഡ് റെക്കോർഡ്’ (OWR) ഓർഗനൈസേഷനാണ് ദുബായ് മുൻസിപ്പാലിറ്റിയുടെ മികച്ച പ്രവർത്തനങ്ങളെ അടിസ്ഥാനമാക്കി ഈ നേട്ടം ഔദ്യോഗികമായി സാക്ഷ്യപ്പെടുത്തിയത്. ഗുണനിലവാരം, റിസ്ക് മാനേജ്മെന്റ്, സർവീസ് നവീകരണം, ഡിജിറ്റൽ പരിവർത്തനം, ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയുടെ സുരക്ഷിതമായ ഉപയോഗം എന്നിവയിൽ അന്താരാഷ്ട്ര വിദഗ്ദ്ധരും ഓഡിറ്റർമാരും നടത്തിയ വിശദമായ വിലയിരുത്തലുകൾക്ക് ശേഷമാണ് ഈ അംഗീകാരം നൽകിയത്.
ഭരണതലത്തിലെ മികവും ഭാവി മുന്നിൽ കണ്ടുള്ള നൂതന സേവനങ്ങളുമാണ് ദുബായ് മുൻസിപ്പാലിറ്റിയെ ഈ വലിയ നേട്ടത്തിലേക്ക് നയിച്ചതെന്ന് ദുബായ് മുൻസിപ്പാലിറ്റി ഡയറക്ടർ ജനറൽ മർവാൻ അഹമ്മദ് ബിൻ ഗലിത വ്യക്തമാക്കി. ദുബായിലെ ജനങ്ങളുടെ ജീവിതനിലവാരം ഉയർത്തുന്നതിനൊപ്പം ലോകത്തിലെ ഏറ്റവും മികച്ച നിക്ഷേപ-ജീവിത നഗരമായി ദുബായിയെ മാറ്റുക എന്ന ഭരണാധികാരികളുടെ കാഴ്ചപ്പാടിന്റെ പ്രതിഫലനമാണ് ഈ ഗ്ലോബൽ റെക്കോർഡെന്നും അദ്ദേഹം കൂട്ടിച്ചേർത്തു. ഡിജിറ്റൽ സേവനങ്ങൾ വഴി ഉപഭോക്തൃ സംതൃപ്തി ഉറപ്പാക്കുന്നതിൽ മുന്നിൽ നിൽക്കുന്ന സ്ഥാപനം, പരിസ്ഥിതി സൗഹൃദ സുസ്ഥിര വികസന പദ്ധതികൾക്കും പ്രത്യേക മുൻഗണന നൽകിവരുന്നു.