ദുബായ് : ഷെയ്ഖ് മുഹമ്മദ് ബിൻ സായിദ് റോഡിൽ (E 311) ഉണ്ടായ രണ്ട് വലിയ വാഹനാപകടങ്ങളെ തുടർന്ന് കനത്ത ഗതാഗതക്കുരുക്ക് അനുഭവപ്പെടുന്നതായി ദുബായ് പോലീസ് ഡ്രൈവർമാർക്ക് മുന്നറിയിപ്പ് നൽകി. അറേബ്യൻ റെഞ്ചസിന് (Arabian Ranches) എതിർവശത്തുണ്ടായ അപകടത്തെ തുടർന്ന് ഷാർജ ഭാഗത്തേക്കുള്ള വാഹന ഗതാഗതം പൂർണ്ണമായും തടസ്സപ്പെട്ടിരിക്കുകയാണ്. ഈ റൂട്ടിൽ വലിയ രീതിയിലുള്ള സമയനഷ്ടം ഉണ്ടായേക്കാമെന്നും ഡ്രൈവർമാർ അതീവ ജാഗ്രത പാലിക്കണമെന്നും അതോറിറ്റി അറിയിച്ചു.
ഇതിന് പുറമെ, ഇതേ ഹൈവേയിൽ (E 311) ദുബായ് ഇൻഡസ്ട്രിയൽ സിറ്റി റൗണ്ട് എബൗട്ടിന് സമീപം അബുദാബി ഭാഗത്തേക്കുള്ള ലെയിനിലും മറ്റൊരു അപകടം റിപ്പോർട്ട് ചെയ്തിട്ടുണ്ട്. രണ്ടിടങ്ങളിലും ഗതാഗതം പുനഃസ്ഥാപിക്കാനുള്ള ശ്രമങ്ങൾ തുടരുകയാണ്. ഈ വഴികളിലൂടെ യാത്ര ചെയ്യുന്നവർ കനത്ത ഗതാഗതക്കുരുക്ക് മുൻകൂട്ടി കണ്ട് ഇതര റോഡുകൾ (Alternative routes) ഉപയോഗിക്കണമെന്ന് ദുബായ് പോലീസ് അഭ്യർത്ഥിച്ചു.