സുരക്ഷിത സമൂഹങ്ങൾക്കായി ഏഷ്യൻ പൊലീസ് ഡയലോഗ്

ദുബായ് : സുരക്ഷിത സമൂഹങ്ങളുടെ നിർമ്മിതി, ജനകീയ പൊലീസ് സംവിധാനം (Community Policing), ജനങ്ങളിൽ വിശ്വാസ്യത വളർത്തൽ തുടങ്ങിയ വിഷയങ്ങൾ ചർച്ച ചെയ്യുന്നതിനായി ഏഷ്യൻ രാജ്യങ്ങളിൽ നിന്നുള്ള പൊലീസ്, കുറ്റകൃത്യ പ്രതിരോധ ഉദ്യോഗസ്ഥർ അബുദാബിയിൽ ഒത്തുകൂടി. അബുദാബി അഡ്നെക് സെന്ററിൽ (ADNEC Centre) നടന്ന വിയന്ന ആസ്ഥാനമായുള്ള 15-ാമത് യു.എൻ കുറ്റകൃത്യ പ്രതിരോധ, ക്രിമിനൽ ജസ്റ്റിസ് കോൺഗ്രസിനോടനുബന്ധിച്ചാണ് ഈ പ്രത്യേക സെഷൻ സംഘടിപ്പിച്ചത്. ഫിലിപ്പീൻസിന്റെ നേതൃത്വത്തിൽ സെപ്റ്റംബർ 29-നാണ് ചർച്ചകൾ നടന്നത്. ‘ഏഷ്യയിലെ കമ്മ്യൂണിറ്റി പൊലീസ്: കുറ്റകൃത്യങ്ങൾ തടയുന്നതിനും സുരക്ഷിത സമൂഹങ്ങൾ കെട്ടിപ്പടുക്കുന്നതിനുമുള്ള നൂതന പ്രാദേശിക സമീപനങ്ങൾ’ (Community Policing in Asia: Innovative Local Approaches for Preventing Crime and Building Safer Communities) എന്നതായിരുന്നു സമ്മേളനത്തിന്റെ മുഖ്യ പ്രമേയം. ഫിലിപ്പീൻസ് നാഷണൽ പോലീസ് കമ്മീഷൻ (Napolcom), നാഷണൽ പോലീസ് ഏജൻസി, നാഷണൽ ക്രൈം പ്രിവൻഷൻ സെക്ഷൻ, ഏഷ്യൻ ക്രൈം പ്രിവൻഷൻ ഫൗണ്ടേഷൻ എന്നിവയുമായി സഹകരിച്ചാണ് ഈ സെഷൻ സംഘടിപ്പിച്ചത്.