ഷാർജ ഭരണാധികാരി പുനരുദ്ധരിച്ച അർമേനിയൻ ആശ്രമം യുഎഇ പ്രവാസികളുടെ പ്രിയപ്പെട്ട വേനൽക്കാല കേന്ദ്രമാകുന്നു

ദുബൈ : യുഎഇ പ്രവാസികൾക്ക് വേനലവധി ആഘോഷിക്കാൻ മികച്ചൊരു വിസ രഹിത ടൂറിസ്റ്റ് കേന്ദ്രമായി മാറിയിരിക്കുകയാണ് അർമേനിയയിലെ ചരിത്രപ്രസിദ്ധമായ ഹഖാർട്സിൻ ക്രിസ്ത്യൻ ആശ്രമം. വർഷങ്ങൾക്ക് മുൻപ് തകർച്ചയുടെ വക്കിലായിരുന്ന ഈ പൗരാണിക സ്മാരകം സംരക്ഷിക്കാൻ സാമ്പത്തിക കൈത്താങ്ങേകിയത് ഷാർജ ഭരണാധികാരി ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയായിരുന്നു. 2005-ൽ അർമേനിയ സന്ദർശിച്ച അദ്ദേഹം ഇതിന്റെ ചരിത്ര പ്രാധാന്യം മനസ്സിലാക്കി 1.7 ദശലക്ഷം ഡോളർ പുനരുദ്ധാരണത്തിനായി നൽകി. പത്താം നൂറ്റാണ്ടിൽ നിർമ്മിതമായ ഈ ആശ്രമം മതസൗഹാർദ്ദത്തിന്റെ വലിയൊരു സന്ദേശമാണ് നൽകുന്നത്. നിലവിൽ 2027 ജൂലൈ വരെ യുഎഇ നിവാസികൾക്ക് അർമേനിയയിലേക്ക് വിസ രഹിതമായി യാത്ര ചെയ്യാൻ സാധിക്കുമെന്നതിനാൽ നിരവധി പ്രവാസികളാണ് ഇവിടേക്ക് എത്തുന്നത്.