കള്ളൻ കപ്പലിൽ കയറുന്നതിന് മുൻപ് ദുബായ് പോലീസ് പൂട്ടി; രക്ഷകനായി മൊബൈലിലെ ആ ഒരു ‘SOS അലർട്ട്’

ദുബൈ : ദേരയിലെ കറൻസി എക്സ്ചേഞ്ച് ഓഫീസിൽ നിന്ന് 1 കോടി ദിർഹം (Dh10 Million) കവർന്ന മൂന്ന് ആഫ്രിക്കൻ സ്വദേശികളെ ദുബായ് പോലീസ് വെറും 10 മിനിറ്റിനുള്ളിൽ പിടികൂടി. ഓഫീസിലെ ജീവനക്കാരെ കെട്ടിയിട്ട് പണവുമായി കടന്നുകളഞ്ഞ കവർച്ചാസംഘത്തെ കുടുക്കാൻ പോലീസിന്റെ അത്യാധുനിക സ്മാർട്ട് ‘SOS’ അടിയന്തര സന്ദേശ സംവിധാനമാണ് സഹായിച്ചത്. അക്രമികൾ പോയയുടൻ കെട്ടഴിച്ചു മാറിയ ഒരു ജീവനക്കാരൻ ഫോണിലൂടെ കൺട്രോൾ റൂമിലേക്ക് അലർട്ട് അയക്കുകയായിരുന്നു. ഉടൻ തന്നെ പ്രവേശന കവാടങ്ങൾ അടച്ച് പോലീസ് നടത്തിയ തിരച്ചിലിൽ ഒരു പ്രതിയെ വാഹനത്തിൽ നിന്നും, ബാക്കി രണ്ടുപേരെ ഹെലികോപ്റ്റർ നിരീക്ഷണത്തിലൂടെ ഒരു വ്യവസായ മേഖലയിൽ നിന്നുമാണ് പിടികൂടിയത്. കവർച്ച ചെയ്യപ്പെട്ട മുഴുവൻ തുകയും പോലീസ് സുരക്ഷിതമായി വീണ്ടെടുത്തു.