സ്വയംനിയന്ത്രിത വാഹനങ്ങൾക്ക് പ്രത്യേക നമ്പർ പ്ലേറ്റുകൾ പ്രഖ്യാപിച്ച് അബുദാബി

അബുദാബി : സ്മാർട്ട് യാത്രാസംവിധാനങ്ങൾ പ്രോത്സാഹിപ്പിക്കുന്നതിന്റെ ഭാഗമായി ഡ്രൈവറില്ലാ വാഹനങ്ങൾക്ക് (Autonomous vehicles) പ്രത്യേക നമ്പർ പ്ലേറ്റുകൾ അവതരിപ്പിച്ച് അബുദാബി. വാണിജ്യാടിസ്ഥാനത്തിൽ സർവീസ് നടത്തുന്ന സ്വയംനിയന്ത്രിത വാഹനങ്ങൾക്ക് ‘ഓട്ടോ ഡ്രൈവ്’ (Auto Drive) എന്നും, പരീക്ഷണ ഓട്ടം നടത്തുന്നവയ്ക്ക് ‘ടെസ്റ്റ്’ (Test) എന്നും രേഖപ്പെടുത്തിയ നീല നിറത്തിലുള്ള പ്ലേറ്റുകളാണ് നൽകുക. അബുദാബി മൊബിലിറ്റിയുടെ കീഴിൽ നിലവിൽ വന്ന ഈ പുതിയ സംവിധാനം വഴി ഇത്തരം അത്യാധുനിക വാഹനങ്ങളെ എളുപ്പത്തിൽ തിരിച്ചറിയാനും അവയുടെ സുരക്ഷയും മാനദണ്ഡങ്ങളും കൃത്യമായി നിരീക്ഷിക്കാനും ട്രാഫിക് അധികൃതർക്ക് സാധിക്കും. ഡ്രൈവറില്ലാ വാഹനങ്ങളുടെ റൂട്ടുകളും വേഗതയും തത്സമയം നിരീക്ഷിക്കുന്നതിനായി കഴിഞ്ഞ ദിവസം അബുദാബിയിൽ പ്രത്യേക സെൻട്രൽ കൺട്രോൾ റൂമും പ്രവർത്തനമാരംഭിച്ചിരുന്നു.