ചൂടിന് തത്കാലം ബൈ! യുഎഇയിലേക്ക് കുളിരായി വീണ്ടും മഴയെത്തി; കൂടെയൊരു കുട കരുതാൻ മറക്കല്ലേ

അബുദാബി : യുഎഇയുടെ വിവിധ ഭാഗങ്ങളിൽ വീണ്ടും മഴയെത്തി. ബുധനാഴ്ച ഉച്ചയ്ക്ക് ശേഷം അൽ ഐൻ – ദുബായ് റോഡിലെ അൽ ഹായർ ഉൾപ്പെടെയുള്ള പ്രദേശങ്ങളിൽ ശക്തമായ കാറ്റിനൊപ്പം മഴ പെയ്തതായി ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. രാജ്യത്തിന്റെ കിഴക്കൻ മേഖലകളിൽ ശക്തമായ കാറ്റും അനുഭവപ്പെട്ടു. കിഴക്കൻ അബുദാബിയിലെ വിവിധ പ്രദേശങ്ങളിൽ ഉച്ചയ്ക്ക് 2 മണി മുതൽ വൈകിട്ട് 7:30 വരെ മഴയ്ക്ക് കാരണമായേക്കാവുന്ന കാർമേഘങ്ങൾ രൂപപ്പെടാൻ സാധ്യതയുണ്ടെന്ന മുന്നറിയിപ്പും അധികൃതർ നൽകിയിരുന്നു. രാജ്യത്തിന്റെ കിഴക്കൻ, തെക്കൻ മേഖലകളിൽ വരും ദിവസങ്ങളിലും ഭാഗികമായി മേഘാവൃതമായ കാലാവസ്ഥയും മഴയും തുടരാനാണ് സാധ്യത. മഴ പെയ്യുമെങ്കിലും ചൂട് ഉയർന്ന നിലയിൽ തന്നെ തുടരുമെന്നാണ് വിലയിരുത്തൽ. മണിക്കൂറിൽ 40 കിലോമീറ്റർ വരെ വേഗതയിൽ വീശിയടിച്ചേക്കാവുന്ന കാറ്റ് പൊടിപടലങ്ങൾ ഉയരാൻ കാരണമായേക്കുമെന്നതിനാൽ തുറസ്സായ സ്ഥലങ്ങളിൽ യാത്ര ചെയ്യുന്നവർ ജാഗ്രത പാലിക്കണമെന്നും കാലാവസ്ഥാ കേന്ദ്രം വ്യക്തമാക്കി.