അബുദാബി : യുഎഇയുടെ ചരിത്ര നിമിഷത്തിന്റെ ഭാഗമാകാൻ പൊതുജനങ്ങൾക്ക് അവസരമൊരുക്കി ഇത്തിഹാദ് റെയിൽ (Etihad Rail). സമൂഹത്തിന് മാതൃകാപരമായ സംഭാവനകൾ നൽകിയ വ്യക്തികളെ ഇത്തിഹാദ് റെയിലിന്റെ ചരിത്രപരമായ ആദ്യ യാത്രയിലേക്ക് നാമനിർദ്ദേശം (Nominate) ചെയ്യാനാണ് അവസരം. തിരഞ്ഞെടുക്കപ്പെടുന്ന ഒരു വ്യക്തിക്ക് 2026 ജൂൺ 30-ന് ഫുജൈറയിൽ നിന്ന് അബുദാബിയിലേക്കുള്ള ആദ്യ ഔദ്യോഗിക പാസഞ്ചർ ട്രെയിൻ സർവീസിലെ ഒന്നാം കാരിയേജിലെ ഒന്നാം നമ്പർ സീറ്റിൽ (Seat 1, Carriage 1) യാത്ര ചെയ്യാനുള്ള സുവർണ്ണാവസരം ലഭിക്കും. ജൂൺ 27 ശനിയാഴ്ച പ്രാദേശിക സമയം രാവിലെ 10 മണി വരെ നാമനിർദ്ദേശങ്ങൾ സമർപ്പിക്കാം. ഇത്തിഹാദ് റെയിലിന്റെ ഔദ്യോഗിക സോഷ്യൽ മീഡിയ ബയോയിലെ ലിങ്ക് വഴിയാണ് അർഹരായവരുടെ വിവരങ്ങൾ പങ്കുവെക്കേണ്ടത്.
ജൂൺ 23-ന് ബുക്കിംഗ് ആരംഭിച്ച് വെറും രണ്ട് ദിവസത്തിനുള്ളിൽ 5,000-ത്തിലധികം ടിക്കറ്റുകളാണ് വിറ്റഴിഞ്ഞത്. ജൂൺ 30-ലെ ഉദ്ഘാടന ദിവസത്തെ മൂന്ന് സർവീസുകളിലെയും മുഴുവൻ സീറ്റുകളും ഇതിനകം തന്നെ പൂർണ്ണമായി ബുക്ക് ചെയ്യപ്പെട്ടു കഴിഞ്ഞു. മണിക്കൂറിൽ 200 കിലോമീറ്റർ വേഗതയിൽ സഞ്ചരിക്കുന്ന ഈ ട്രെയിനുകളിൽ 400 യാത്രക്കാർക്ക് ഒരേസമയം യാത്ര ചെയ്യാം. അബുദാബി, ദുബായ്, ഷാർജ, ഫുജൈറ ഉൾപ്പെടെ യുഎഇയിലുടനീളം 11 സ്റ്റേഷനുകളാണ് ഇത്തിഹാദ് റെയിൽ ശൃംഖലയിലുള്ളത്. പുതിയ സർവീസ് യാഥാർത്ഥ്യമാകുന്നതോടെ അബുദാബിയിൽ നിന്ന് ഫുജൈറയിലേക്ക് വെറും 105 മിനിറ്റുകൊണ്ടും, അബുദാബിയിൽ നിന്ന് ദുബായിലേക്ക് 57 മിനിറ്റുകൊണ്ടും എത്തിച്ചേരാനാകും. കംഫർട്ട് ക്ലാസിന് 55 ദിർഹവും ഫസ്റ്റ് ക്ലാസിന് 120 ദിർഹവുമാണ് പ്രാരംഭ നിരക്കുകൾ.
