അബുദാബി : അബുദാബി അന്താരാഷ്ട്ര പുസ്തകമേളയിൽ (ADIBF) ചരിത്രപ്രേമികളെയും പുരാവസ്തു ശേഖരകരെയും ആകർഷിച്ച് അപൂർവ്വ കൈയെഴുത്തുപ്രതികളുടെയും പുസ്തകങ്ങളുടെയും വൻ ശേഖരം. ബിസി രണ്ടാം നൂറ്റാണ്ടിലെ പാപ്പിറസ് താളുകളിൽ എഴുതിയ ഹോമറിന്റെ ‘ഇലിയഡ്’ (Iliad) ഗ്രന്ഥത്തിന്റെ ഭാഗങ്ങൾ, 17-ാം നൂറ്റാണ്ടിലെ രാജകീയ വിവാഹ സമ്മാനമായി നൽകിയ ബൈബിൾ, ഷെയ്ഖ് സായിദിന്റെ പ്രിയപ്പെട്ട പ്രാവപിടിയൻ പക്ഷി (Falcon) ‘നമ്പർ 1’ന്റെ വെങ്കല ശില്പം എന്നിവയാണ് മേളയിലെ പ്രധാന ആകർഷണങ്ങൾ. ഓസ്ട്രിയൻ അപൂർവ്വ പുസ്തക വ്യാപാരികളായ ‘ഇൻലിബ്രിസ്’ (Inlibris) ആണ് ഈ അപൂർവ്വ ചരിത്ര വസ്തുക്കൾ പ്രദർശനത്തിനും വിൽപ്പനയ്ക്കുമായി എത്തിച്ചിരിക്കുന്നത്.
സുവിശേഷ ഭാഗങ്ങളും 1658-ലെ ജാപ്പനീസ് ചിത്രചുരുളുകളും അടക്കം ലക്ഷക്കണക്കിന് യൂറോ വിലമതിക്കുന്ന അപൂർവ്വ ശേഖരങ്ങളാണ് സ്റ്റാളിലുള്ളത്. 65,000 യൂറോ വിലയുള്ള ബൈബിൾ സ്വർണ്ണവും രത്നങ്ങളും പതിപ്പിച്ച കവറുകളോടെയാണ് സൂക്ഷിച്ചിരിക്കുന്നത്. 2000-ൽ ബ്രിട്ടീഷ് ശില്പി ഡേവിഡ് സെമ്മിക്ക് (David Cemmick) ഷെയ്ഖ് സായിദിന്റെ ക്ഷണം സ്വീകരിച്ച് അബുദാബിയിലെത്തി, സർ ബാനി യാസ് ദ്വീപിൽ വെച്ച് നേരിട്ട് കണ്ട് നിർമ്മിച്ചതാണ് ‘നമ്പർ 1’ ഫാൽക്കണിന്റെ വെങ്കല ശില്പം. മ്യൂസിയങ്ങൾ, ലൈബ്രറികൾ, ഗവേഷണ സ്ഥാപനങ്ങൾ എന്നിവർക്കായി കൈമാറാൻ ഉദ്ദേശിച്ചാണ് ഈ അമൂല്യ വസ്തുക്കൾ അബുദാബിയിലെത്തിച്ചിരിക്കുന്നത്.
