യാത്രക്കാർക്ക് മികച്ച യാത്രാസൗകര്യങ്ങളൊരുക്കാൻ ഇത്തിഹാദ് റെയിൽ

അബുദാബി : ട്രെയിൻ യാത്രക്കാർക്ക് സ്റ്റേഷനുകളിൽ നിന്ന് തുടർന്നുള്ള യാത്രകൾ സുഗമമാക്കുന്നതിനായി വൻ ഇളവുകളും സൗകര്യങ്ങളും പ്രഖ്യാപിച്ച് ഇത്തിഹാദ് റെയിൽ (Etihad Rail). മുഹമ്മദ് ബിൻ സായിദ് സിറ്റി സ്റ്റേഷനിൽ നിന്ന് തലസ്ഥാനത്തെ പ്രധാന കേന്ദ്രങ്ങളായ കോർണിഷ് റോഡിലെ അഡ്‌നോക് ആസ്ഥാനം, അഡ്‌നെക് സെന്റർ, റീം മാൾ എന്നിവിടങ്ങളിലേക്ക് വെറും 10 ദിർഹത്തിന് ഷട്ടിൽ ബസ് സർവീസ് (Dh10 bus shuttle) ഏർപ്പെടുത്തും. ഇത്തിഹാദ് റെയിൽ ആപ്പ് വഴിയോ വെബ്‌സൈറ്റ് വഴിയോ ഇത് മുൻകൂട്ടി ബുക്ക് ചെയ്യാം.
കൂടാതെ ഫുജൈറ സ്റ്റേഷൻ തുറക്കുന്ന ദിവസം മുതൽ തന്നെ യാത്രക്കാർക്കായി കാർ റെന്റൽ ഡെസ്ക്, ടാക്സി സ്റ്റാൻഡുകൾ, ഇ-ഹെയ്‌ലിംഗ് പിക്ക്-അപ്പ് പോയിന്റുകൾ, ബസ് സർവീസുകൾ എന്നിവ ലഭ്യമാക്കുമെന്ന് ഇത്തിഹാദ് റെയിൽ മൊബിലിറ്റി കൊമേഴ്‌സ്യൽ എക്‌സിക്യൂട്ടീവ് ഡയറക്ടർ അദ്ര അൽമൻസൂരി അറിയിച്ചു. ട്രെയിനുകളുടെ സമയത്തിനനുസരിച്ച് പൊതുഗതാഗത സംവിധാനങ്ങൾ ക്രമീകരിക്കാൻ അതോറിറ്റികളുമായി ചർച്ചകൾ പൂർത്തിയായിട്ടുണ്ട്. വിനോദസഞ്ചാരികളെ ആകർഷിക്കാൻ ട്രെയിൻ-ഹോട്ടൽ പാക്കേജുകൾ അവതരിപ്പിക്കുമെന്നും സ്റ്റേഷനുകൾക്ക് സമീപം പുതിയ റെസ്റ്റോറന്റുകളും റീട്ടെയിൽ ഔട്ട്‌ലെറ്റുകളും സ്ഥാപിക്കാൻ ബിസിനസ്സ് ഗ്രൂപ്പുകൾ താല്പര്യം പ്രകടിപ്പിച്ചിട്ടുണ്ടെന്നും അധികൃതർ വ്യക്തമാക്കി.