റാസൽഖൈമ : ഈ വർഷമാദ്യം യുഎഇയിലുണ്ടായ കനത്ത മഴ റാസൽഖൈമയിലെ പർവതമേഖലകളിലെ പരമ്പരാഗത സമർ (Samar Honey) തേൻ ഉൽപ്പാദനത്തെ പ്രതികൂലമായി ബാധിച്ചതായി തേൻ ഉൽപ്പാദകർ. സാധാരണയായി മെയ് പകുതി മുതൽ ജൂൺ പകുതി വരെയുള്ള കാലയളവിലാണ് മലനിരകളിൽ നിന്ന് പ്രശസ്തമായ സമർ തേൻ വിളവെടുക്കുന്നത്. എന്നാൽ ഇത്തവണ പെയ്ത ശക്തമായ മഴ മലയോര മരങ്ങളുടെ പൂവിടൽ പ്രക്രിയയെയും തേനീച്ചകളുടെ തേൻ ശേഖരണത്തെയും ബാധിച്ചതാണ് ഉൽപ്പാദനം കുറയാൻ കാരണമായതെന്ന് ‘രഗൂ ഹണി’ ഉടമ ജമാൽ റാഷിദ് ഹംദൂൻ വ്യക്തമാക്കി.
മലനിരകളിൽ വിളവ് കുറഞ്ഞപ്പോൾ, റാസൽഖൈമയിലെ തീരദേശ കണ്ടൽക്കാടുകളിൽ (Mangrove) നിന്നുള്ള തേൻ ഉൽപ്പാദനം ഇത്തവണ റെക്കോർഡ് നേട്ടമാണ് കൈവരിച്ചത്. ഉയർന്ന ഗുണനിലവാരമുള്ള മാൻഗ്രോവ് തേൻ ഈ സീസണിൽ സമൃദ്ധമായി ലഭിച്ചു. കനത്ത ചൂടും ദുർഘടമായ മലപാതകളും താണ്ടി കഠിനപ്രയത്നത്തിലൂടെയാണ് പീച്ചുകാർ തേൻകൂടുകളിൽ നിന്ന് തേൻ വേർതിരിച്ചെടുക്കുന്നത്. വിപണിയിൽ ഏറെ ആവശ്യക്കാരുള്ള സമർ തേനിന് ഉൽപ്പാദനക്കുറവ് കാരണം ഇത്തവണ വില വർദ്ധിക്കാൻ സാധ്യതയുണ്ടെന്ന് വിദഗ്ദ്ധർ ചൂണ്ടിക്കാണിക്കുന്നു. തലമുറകളായി കൈമാറിവന്ന പരമ്പരാഗത അറിവുകളും ആധുനിക സാങ്കേതികവിദ്യയും സമന്വയിപ്പിച്ചാണ് യുഎഇയിലെ സ്വദേശികൾ ഇപ്പോഴും ഈ രംഗത്ത് പ്രവർത്തിക്കുന്നത്.
24