അൽ ഐൻ: മൊബൈൽ ഫോൺ റീച്ചാർജ് ചെയ്യുന്നതിനുള്ള വ്യാജ വെബ്‌സൈറ്റ് നിർമ്മിച്ച് ലക്ഷങ്ങൾ തട്ടിയ കേസിൽ ഇരയായ വ്യക്തിക്ക് തുക തിരികെ നൽകാൻ രണ്ട് യുവാക്കൾക്ക് അൽ ഐൻ സിവിൽ, കൊമേഴ്‌സ്യൽ ആൻഡ് അഡ്മിനിസ്‌ട്രേറ്റീവ് കോടതി ഉത്തരവിട്ടു. തട്ടിപ്പിലൂടെ അപഹരിച്ച 15,000 ദിർഹം (ഏകദേശം മൂന്നര ലക്ഷത്തിലധികം ഇന്ത്യൻ രൂപ) പരാതിക്കാരന് തിരികെ നൽകാനാണ് വിധി. ഇതിന് പുറമെ, തട്ടിപ്പ് മൂലം ഇരയായ വ്യക്തിക്കുണ്ടായ സാമ്പത്തിക നഷ്ടത്തിനും മാനസിക വിഷമങ്ങൾക്കും നഷ്ടപരിഹാരമായി 3,000 ദിർഹം കൂടി പ്രതികൾ നൽകണമെന്ന് കോടതി വ്യക്തമാക്കി. ഒഫീഷ്യൽ റീച്ചാർജ് സൈറ്റുകളോട് സാമ്യമുള്ള രീതിയിൽ തയാറാക്കിയ വ്യാജ പോർട്ടൽ വഴിയാണ് യുവാക്കൾ പണം തട്ടിയതെന്ന് കോടതി രേഖകൾ വ്യക്തമാക്കുന്നു. ഇലക്ട്രോണിക് തട്ടിപ്പിലൂടെ പ്രതികൾ അനധികൃതമായി പണം കൈക്കലാക്കിയതായി കണ്ടെത്തിയതിനെ തുടർന്നാണ് കോടതിയുടെ നിർണ്ണായക ഇടപെടൽ.
