അബുദാബി: ‘വി ദി യുഎഇ 2031’ (We the UAE 2031) എന്ന ദേശീയ വികസന കാഴ്ചപ്പാടിന് കരുത്തുപകർന്നുകൊണ്ട് യുഎഇയുടെ സമ്പദ്‌വ്യവസ്ഥയിൽ വൻ മുന്നേറ്റം. കഴിഞ്ഞ 2025 സാമ്പത്തിക വർഷത്തിൽ രാജ്യത്തിന്റെ ആഭ്യന്തര ഉൽപ്പാദനം (GDP) 6.2 ശതമാനം വളർച്ച രേഖപ്പെടുത്തി 1.9 ട്രില്യൺ ദിർഹമായി ഉയർന്നതായി ഔദ്യോഗിക കണക്കുകൾ വ്യക്തമാക്കുന്നു. എണ്ണയിതര മേഖലകളുടെ മികച്ച പ്രകടനമാണ് ഈ റെക്കോർഡ് നേട്ടത്തിന് പിന്നിൽ പ്രധാന പങ്കുവഹിച്ചത്. രാജ്യത്തെ എണ്ണയിതര ജിഡിപി 6.8 ശതമാനം വളർച്ചയോടെ 1.5 ട്രില്യൺ ദിർഹത്തിൽ എത്തിനിൽക്കുകയാണ്.
പുതിയ സാമ്പത്തിക കണക്കുകളെക്കുറിച്ച് വ്യക്തമാക്കിയ യുഎഇ സാമ്പത്തിക-ടൂറിസം മന്ത്രി അബ്ദുള്ള ബിൻ തൗഖ് അൽ മർറി, ദേശീയ സമ്പദ്‌വ്യവസ്ഥയുടെ ഈ ശക്തമായ പ്രകടനം രാജ്യം ലക്ഷ്യമിട്ട സുസ്ഥിരവും യഥാർത്ഥവുമായ പുരോഗതിയെയാണ് പ്രതിഫലിപ്പിക്കുന്നതെന്ന് അഭിപ്രായപ്പെട്ടു. ആഗോള സാമ്പത്തിക വെല്ലുവിളികൾക്കിടയിലും യുഎഇ നടപ്പിലാക്കിയ കൃത്യമായ സാമ്പത്തിക നയങ്ങളും വൈവിധ്യവൽക്കരണ പദ്ധതികളും രാജ്യത്തിന്റെ വളർച്ചയ്ക്ക് പുതിയ ദിശാബോധം നൽകിയതായും അദ്ദേഹം കൂട്ടിച്ചേർത്തു.