ദുബായ്: സ്വന്തം നാട്ടിലുള്ള കുടുംബങ്ങൾക്ക് മെച്ചപ്പെട്ട ഒരു ഭാവി കെട്ടിപ്പടുക്കുക എന്ന വലിയ ലക്ഷ്യത്തോടെയാണ് വിദേശ രാജ്യങ്ങളിൽ ജോലി ചെയ്യുന്ന പല ഫിലിപ്പിനോ പ്രവാസികളും (OFWs) യുഎഇയിലേക്ക് വണ്ടി കയറുന്നത്. ജേ എസ്ക്വേറ്റ, ഡെലിയ റൂബിയോസ്, ക്രിസ്സി അസുൻസിയോൻ, കാർല കാസ്ട്രോ എന്നീ നാല് സുഹൃത്തുക്കളുടെ കാര്യത്തിലും ഇത് വ്യത്യസ്തമായിരുന്നില്ല. കുടുംബത്തിന്റെ ഏക വരുമാന മാർഗ്ഗമെന്ന നിലയിൽ കടുത്ത പ്രയത്നങ്ങളും നീണ്ട ജോലി സമയങ്ങളുമൊക്കെയായിട്ടാണ് ഇവർ തങ്ങളുടെ പ്രവാസജീവിതം ആരംഭിച്ചത്. സ്വന്തം വ്യക്തിപരമായ ആഗ്രഹങ്ങൾക്കപ്പുറം നാട്ടിലുള്ളവരുടെ സ്വപ്നങ്ങളായിരുന്നു ഇവരെ നയിച്ചിരുന്നത്. എന്നാൽ യുഎഇയെ തങ്ങളുടെ രണ്ടാം ജന്മനാടായി സ്വീകരിച്ച ഇവർ, പ്രവാസത്തിനിടയിൽ കണ്ടെത്തിയ സൗഹൃദം തങ്ങളുടെ ജീവിതത്തെ മറ്റൊരു തലത്തിലേക്ക് മാറ്റുമെന്നോ വലിയൊരു വിജയഗാഥയായി മാറുമെന്നോ ഒരിക്കലും പ്രതീക്ഷിച്ചിരുന്നില്ല.
തങ്ങളുടെ കരിയർ കെട്ടിപ്പടുക്കുന്നതിനിടയിൽ സ്വാഭാവികമായി രൂപപ്പെട്ട ഈ കൂട്ടുകെട്ടാണ് ഇവരെ ഇന്നിപ്പോൾ യുഎഇയിലെ വിജയശില്പികളാക്കി മാറ്റിയത്. 2005-ൽ ദുബായിൽ എത്തിയ ജേ, ഡെലിയ, ക്രിസ്സി എന്നിവർക്കൊപ്പം 2018-ലാണ് കാർല ചേരുന്നത്. ഒരേ മുറിയിലെ താമസക്കാരായി വീട്ടുവാടക പങ്കിട്ടു തുടങ്ങിയ ജേയും ഡെലിയയും പിന്നീട് പ്രവാസലോകത്തെ സമാനമായ പ്രതിസന്ധികളെയും പോരാട്ടങ്ങളെയും ഒരുമിച്ച് നേരിടുകയായിരുന്നു. വെറും വാടക പങ്കിടലിൽ നിന്ന് ആരംഭിച്ച് ഇന്ന് വലിയൊരു ബിസിനസ്സ് വിജയത്തിലേക്കും പരസ്പര പിന്തുണയിലേക്കും വളർന്ന ഇവരുടെ കഥ യുഎഇയിലെ ലക്ഷക്കണക്കിന് വരുന്ന പ്രവാസികൾക്ക് വലിയൊരു പ്രചോദനമാണ് നൽകുന്നത്.