ദുബായ്: കേവലം 1500 ദിർഹം പ്രതിമാസ ശമ്പളമുള്ള ആയുർവേദ തെറാപ്പിസ്റ്റായി 2012-ൽ ദുബായിൽ എത്തിയ ഒരു സാധാരണക്കാരൻ ഇന്ന് കോടികളുടെ വാർഷിക വിറ്റുവരവുള്ള പ്രമുഖ സംരംഭകനായി മാറിയ വിജയഗാഥ പ്രവാസലോകത്തിന് മാതൃകയാകുന്നു. കഠിനാധ്വാനവും ലക്ഷ്യബോധവും കൈമുതലാക്കി ദുബായിൽ സ്വന്തമായി ആയുർവേദ ഹെൽത്ത് സെന്റർ സ്ഥാപിക്കുകയും മറ്റ് രണ്ട് സ്ഥാപനങ്ങളിൽ പങ്കാളിയാകുകയും ചെയ്ത സന്തോഷ് കുഞ്ഞുമോൻ എന്ന മലയാളിയാണ് ഈ അപൂർവ്വ നേട്ടം സ്വന്തമാക്കിയത്. നിലവിൽ ഒരു മില്യണിലധികം (പത്ത് ലക്ഷത്തിലധികം) ദിർഹമാണ് ഇദ്ദേഹത്തിന്റെ സ്ഥാപനങ്ങളുടെ വാർഷിക വിറ്റുവരവ്. ഗവൺമെന്റിന്റെ നിയമങ്ങൾ കൃത്യമായി പാലിക്കാൻ തയ്യാറാണെങ്കിൽ ബിസിനസ്സ് ചെയ്യാൻ ലോകത്ത് ഏറ്റവും അനുയോജ്യമായ സ്ഥലം ദുബായ് ആണെന്ന് സന്തോഷ് സാക്ഷ്യപ്പെടുത്തുന്നു. കഠിനാധ്വാനം ചെയ്യാൻ മനസ്സുള്ളവർക്കൊപ്പം വളരുന്ന ദുബായ് നഗരത്തിന്റെ വികസനക്കാഴ്ചപ്പാടിനോട് ചേർന്നുനിൽക്കുന്നതാണ് സന്തോഷിന്റെയും ജീവിതം.
കോവിഡ് പ്രതിസന്ധിയുടെ കാലത്ത് യുഎഇ ഭരണകൂടം നൽകിയ വലിയ പിന്തുണയും ഇളവുകളും കൃത്യമായ ബിസിനസ്സ് നിയമങ്ങളുമാണ് തനിക്ക് സംരംഭകത്വ മേഖലയിലേക്ക് ചുവടുവെക്കാനും വിജയം വരിക്കാനുമുള്ള ശക്തമായ അടിത്തറയേകിയതെന്ന് അദ്ദേഹം കൃതജ്ഞതയോടെ ഓർക്കുന്നു.