ദുബായ് : ഒക്ടോബർ മാസത്തിൽ അന്താരാഷ്ട്ര യാത്രക്കാരുടെ ഇരിപ്പിട ശേഷിയിൽ (Scheduled International Seats) ലോകത്തിലെ ഏറ്റവും തിരക്കേറിയ വിമാനത്താവളമെന്ന പദവി നിലനിർത്തി ദുബായ് അന്താരാഷ്ട്ര വിമാനത്താവളം (DXB). പ്രമുഖ അന്താരാഷ്ട്ര വ്യോമയാന ഡാറ്റാ ഏജൻസിയായ ‘ഒഎജി’ (OAG) പുറത്തുവിട്ട കണക്കുകൾ പ്രകാരം ഇരുവശങ്ങളിലേക്കുമായി 91.5 ലക്ഷം സീറ്റുകളാണ് ഈ മാസം ദുബായിൽ ക്രമീകരിച്ചിരിക്കുന്നത്. രണ്ടാം സ്ഥാനത്തുള്ള ലണ്ടൻ ഹിത്രൂ വിമാനത്താവളത്തേക്കാൾ (41.2 ലക്ഷം) 4.5 ലക്ഷത്തിലധികം സീറ്റുകളുടെ വൻ മേധാവിത്വമാണ് ദുബായ് കൈവരിച്ചത്.
സെപ്റ്റംബറിലെ 43.4 ലക്ഷം സീറ്റുകളിൽ നിന്ന് 5.3 ശതമാനം വളർച്ചയോടെയാണ് ഒക്ടോബറിൽ അന്താരാഷ്ട്ര സീറ്റ് ശേഷി 45.7 ലക്ഷമായി ഉയർന്നത്. ദക്ഷിണ കൊറിയയിലെ സിയോൾ ഇഞ്ചിയോൺ (39.4 ലക്ഷം), ആംസ്റ്റർഡാം സ്കിപോൾ (37.2 ലക്ഷം), സിംഗപ്പൂർ ചാംഗി (36.8 ലക്ഷം) എന്നിവയാണ് പട്ടികയിൽ തുടർസ്ഥാനങ്ങളിലുള്ളത്. എമിറേറ്റ്സ്, ഫ്ലൈദുബായ് എന്നീ വിമാനക്കമ്പനികളുടെ ശക്തമായ സർവീസുകളും മറ്റ് അന്താരാഷ്ട്ര വിമാനക്കമ്പനികളുടെ സർവീസ് വർദ്ധനവുമാണ് ദുബായിയുടെ ഈ മികച്ച നേട്ടത്തിന് പിന്നിൽ. 2025-ൽ 9.52 കോടി യാത്രക്കാരെ സ്വീകരിച്ച് ചരിത്രത്തിലെ ഏറ്റവും ഉയർന്ന വളർച്ച നേടിയ ദുബായ്, അന്താരാഷ്ട്ര യാത്രാ സർവീസുകളിൽ തുടർച്ചയായ 12-ാം വർഷവും ഒന്നാം സ്ഥാനം നിലനിർത്തിയിരുന്നു.
