ദുബായ് : സർക്കാർ ഓഡിറ്റിംഗിലും മേൽനോട്ടത്തിലും കൃത്രിമബുദ്ധിയുടെയും (AI) നൂതന സാങ്കേതികവിദ്യകളുടെയും സ്വാധീനം ചർച്ച ചെയ്യുന്നതിനായി ‘ഫോർസീയിംഗ് ഗവൺമെന്റ് ഓഡിറ്റ് ഫ്യൂച്ചർ കോൺഫറൻസിന്റെ’ (Foreseeing Government Audit Future Conference) മൂന്നാം പതിപ്പ് ദുബായിൽ നടക്കും. ഫിനാൻഷ്യൽ ഓഡിറ്റ് അതോറിറ്റി (FAA) സംഘടിപ്പിക്കുന്ന സമ്മേളനം ഒക്ടോബർ 28, 29 തീയതികളിൽ ‘സ്മാർട്ട് ഓഡിറ്റ്’ എന്ന പ്രമേയത്തിലാണ് അരങ്ങേറുന്നത്. മുതിർന്ന സർക്കാർ ഉദ്യോഗസ്ഥർ, ഓഡിറ്റിംഗ് പ്രൊഫഷണലുകൾ, സൈബർ സുരക്ഷാ വിദഗ്ദ്ധർ എന്നിവർ പങ്കാളികളാകും.
സൈബർ റിസ്കുകൾ, വളർന്നുവരുന്ന സാങ്കേതികവിദ്യകൾ, ഇന്റേണൽ ഓഡിറ്റിംഗിലെ എഐ ഉപയോഗം എന്നിവയാണ് സമ്മേളനത്തിലെ പ്രധാന ചർച്ചാവിഷയങ്ങൾ. പബ്ലിക് ഫണ്ടുകളുടെ സംരക്ഷണത്തിനും കൂടുതൽ സുതാര്യവും കാര്യക്ഷമവുമായ ഗവേണൻസ് മാതൃകകൾ നിർമ്മിക്കുന്നതിനും എഐ അധിഷ്ഠിത ഓഡിറ്റിംഗ് സഹായിക്കുമെന്ന് എഫ്എഎ ഡയറക്ടർ ജനറൽ വ്യക്തമാക്കി. ഒക്ടോബർ 28-ന് നടക്കുന്ന പരിശീലന ശിൽപ്പശാലകളോടെ തുടക്കമാകുന്ന കോൺഫറൻസ്, ഭാവി തലമുറയിലെ ഓഡിറ്റർമാർക്ക് ആവശ്യമായ സൈബർ, എഐ കഴിവുകൾ വികസിപ്പിക്കുന്നതിനും മുൻഗണന നൽകുന്നു.
