യുഎസ് വിസയ്ക്ക് ചെറിയ കുറ്റകൃത്യങ്ങളും തടസ്സമാകാം മുന്നറിയിപ്പുമായി യുഎഇ

ദുബായ് : യുഎസിലെ സർവ്വകലാശാലകളിൽ ഉന്നതപഠനം ലക്ഷ്യമിടുന്ന യുഎഇയിലെ വിദ്യാർത്ഥികൾക്ക് കടുത്ത മുന്നറിയിപ്പുമായി വിദ്യാഭ്യാസ വിദഗ്ദ്ധർ. മുൻകാലങ്ങളിൽ നിസ്സാരമെന്ന് കരുതി തള്ളിക്കളഞ്ഞിരുന്ന ചെറിയ ശിക്ഷണ നടപടികളോ നിയമലംഘനങ്ങളോ മുൻനിർത്തി ഇപ്പോൾ യുഎസ് സ്റ്റുഡന്റ് വിസകൾ നിരസിക്കപ്പെടാൻ സാധ്യതയുണ്ടെന്ന് ‘സ്കോർ പ്ലസ്’ (Score Plus) സ്ഥാപനത്തിലെ കൗൺസിലർമാർ ചൂണ്ടിക്കാണിക്കുന്നു. നിയമങ്ങളിൽ മാറ്റമൊന്നും വരുത്തിയിട്ടില്ലെങ്കിലും, ഇമിഗ്രേഷൻ നയങ്ങൾ കൂടുതൽ കർശനമായി നടപ്പിലാക്കുന്നതാണ് നിലവിലെ അനിശ്ചിതത്വത്തിന് കാരണം.
വിദ്യാർത്ഥികൾ സ്കൂൾ തലത്തിൽ നടത്തുന്ന പെരുമാറ്റദൂഷ്യങ്ങളും നിയമലംഘനങ്ങളും വിസ പ്രക്രിയയെ പ്രതികൂലമായി ബാധിക്കുമെന്നതിനാൽ ഒൻപതാം ക്ലാസ് മുതൽ തന്നെ കൃത്യമായ പ്ലാനിംഗോടെ പ്രൊഫൈൽ കെട്ടിപ്പടുക്കാൻ വിദഗ്ദ്ധർ നിർദ്ദേശിക്കുന്നു. മുൻപ് ഇത്തരം കാര്യങ്ങളിൽ കാണിച്ചിരുന്ന ഇളവുകൾ ഇപ്പോൾ ലഭിക്കാറില്ലെന്നും വിസ നിരസിക്കപ്പെടാനുള്ള സാധ്യത ഒഴിവാക്കാൻ അച്ചടക്കം പാലിക്കേണ്ടത് അത്യാവശ്യമാണെന്നും കൗൺസിലർ മൈക്കൽ ഗാമർൽ വ്യക്തമാക്കി. വിസ ലഭ്യതയിലെ അനിശ്ചിതത്വം കാരണം പല കുടുംബങ്ങളും യുഎസിന് പുറമേയുള്ള മറ്റ് രാജ്യങ്ങളിലെ സർവ്വകലാശാലകളെയും ഇപ്പോൾ പരിഗണിക്കുന്നുണ്ട്.