ദുബായ് : അപരിചിതരെ ഒരു മേശയ്ക്ക് ചുറ്റുമിരുത്തി ഭക്ഷണത്തിലൂടെ സുഹൃത്തുക്കളാക്കുന്ന വ്യത്യസ്തമായ ‘സപ്പർ ക്ലബ്’ (Supper Club) ആശയവുമായി ദുബായിൽ ശ്രദ്ധേയയാവുകയാണ് ലിസ വോ എന്ന ‘മാഡം വോ’. ജിയോപൊളിറ്റിക്സ്, ഗവൺമെന്റ് കമ്മ്യൂണിക്കേഷൻസ് എന്നീ മേഖലകളിലെ മികച്ച കോർപ്പറേറ്റ് കരിയർ ഉപേക്ഷിച്ചാണ് ലിസ തന്റെ പാചക അഭിനിവേശത്തിലേക്ക് പൂർണ്ണമായി ഇറങ്ങിയത്.
ജർമ്മനിയിൽ ജനിച്ച് വളർന്ന വിയറ്റ്നാമീസ്-ചൈനീസ് വംശജയായ ലിസ, 2014-ലാണ് ദുബായിൽ എത്തിയത്. കോവിഡ് ലോക്ക്ഡൗൺ കാലത്തെ ഏകാന്തതയിൽ നിന്നാണ് ‘ഹൗസ് ഓഫ് വോ’ (Haus of Vo) എന്ന സപ്പർ ക്ലബ്ബിന്റെ ജനനം. ‘ഭക്ഷണത്തിന് മുന്നിൽ ആരും ഒറ്റയ്ക്കല്ല’ എന്ന ലളിതമായ തത്വശാസ്ത്രത്തിലാണ് ഇത് പ്രവർത്തിക്കുന്നത്. ജർമ്മൻ ഭാഷയിൽ വീട് എന്നർത്ഥം വരുന്ന ‘Haus’ എന്ന വാക്കും സ്വന്തം കുടുംബപ്പേരായ ‘Vo’യും ചേർത്താണ് ക്ലബ്ബിന് പേരിട്ടത്.
ഡിഐഎഫ്സിയിലെ (DIFC) ചെറിയ ഫ്ലാറ്റിൽ വെറും 6 പേരുമായി തുടങ്ങിയ ക്ലബ്ബ്, നാല് വർഷം പിന്നിടുമ്പോൾ 300-ലധികം വേദികളിലായി ആയിരക്കണക്കിന് അതിഥികളെ സ്വീകരിച്ചു കഴിഞ്ഞു. 2024 മുതൽ ഇതൊരു പൂർണ്ണസമയ സംരംഭമാക്കി ലിസ മാറ്റി.
ഡംപ്ലിങ് (Dumpling) നിർമ്മാണ ക്ലാസ്സുകളോടെയാണ് ഇവിടുത്തെ വിരുന്ന് ആരംഭിക്കുന്നത്. ഇത് അതിഥികൾ തമ്മിലുള്ള അപരിചിതത്വം മാറ്റാൻ സഹായിക്കുന്നു. തുടർന്ന് ലിസയും സംഘവും തയ്യാറാക്കുന്ന 7 വിഭവങ്ങളടങ്ങിയ വിഭവസമൃദ്ധമായ അത്താഴം വിളമ്പും. ഇതിലെ ‘സ്റ്റഫ്ഡ് ഷെൽ ക്രാബ്’ (Stuffed Shell Crab), ‘സ്കലോപ്പ് സെവിഷെ’ (Scallop Ceviche) എന്നിവ ഇവിടുത്തെ സിഗ്നേച്ചർ വിഭവങ്ങളാണ്. വിരുന്നിനെത്തുന്നവർ വെറും അപരിചിതരായി വന്ന് മികച്ച സുഹൃത്തുക്കളായിട്ടാണ് മടങ്ങുന്നത്. തന്റെ വിവാഹത്തിൽ പങ്കെടുത്തവരിൽ പത്തിലധികം പേർ ഈ സപ്പർ ക്ലബ്ബിലൂടെ പരിചയപ്പെട്ടവരാണെന്നും ലിസ സന്തോഷത്തോടെ പങ്കുവെക്കുന്നു.