ദുബായ് : തൊഴിലാളികളുടെ അവകാശങ്ങൾ സംരക്ഷിക്കുന്നതിനും സുരക്ഷിതമായ തൊഴിൽ അന്തരീക്ഷം ഉറപ്പാക്കുന്നതിനും യുഎഇയിൽ കർശനമായ നിയമങ്ങളും പുതിയ നയങ്ങളും നടപ്പിലാക്കുന്നു. ഇതിന്റെ ഭാഗമായി ഈ വർഷത്തെ ഉച്ചവിശ്രമ നിയമം (Midday Break Policy) ഇന്ന് (ജൂൺ 15 തിങ്കളാഴ്ച) മുതൽ രാജ്യത്ത് പ്രാബല്യത്തിൽ വന്നു.
തുടർച്ചയായ 22-ാം വർഷമാണ് യുഎഇ ഈ നിയമം നടപ്പിലാക്കുന്നത്. സെപ്റ്റംബർ 15 വരെ മൂന്ന് മാസത്തേക്കാണ് നിയമം. ഈ കാലയളവിൽ ഉച്ചയ്ക്ക് 12:30 മുതൽ വൈകുന്നേരം 3:00 മണി വരെ നേരിട്ട് വെയിൽ ഏൽക്കുന്ന രീതിയിലുള്ള ജോലികൾ ചെയ്യിക്കാൻ പാടുള്ളതല്ല. ഡെലിവറി തൊഴിലാളികൾക്കായി രാജ്യത്തുടനീളം 12,000-ലധികം എയർകണ്ടീഷൻ ചെയ്ത വിശ്രമ കേന്ദ്രങ്ങളും അതോറിറ്റി ഒരുക്കിയിട്ടുണ്ട്.
തൊഴിലാളികളുടെ സാമ്പത്തിക സുരക്ഷിതത്വം ഉറപ്പാക്കാൻ 2026 ജൂൺ മുതൽ സ്വകാര്യ മേഖലയിലെ ജീവനക്കാരുടെ ശമ്പള വിതരണത്തിനായി എല്ലാ കലണ്ടർ മാസത്തിലെയും ഒന്നാം തീയതി മന്ത്രാലയം നിശ്ചയിച്ചിട്ടുണ്ട്. കമ്പനികൾ വേതന സംരക്ഷണ സംവിധാനം (WPS) വഴി മാത്രമേ ശമ്പളം നൽകാവൂ. നിലവിൽ 99% തൊഴിലാളികളും ഡബ്ല്യുപിഎസ് പരിധിയിലാണ്.
തൊഴിലാളികളുടെ ക്ഷേമം മുൻനിർത്തി 2025-26 വർഷങ്ങളിൽ വിപുലമായ പദ്ധതികളാണ് യുഎഇ നടപ്പാക്കിയത്. തൊഴിലില്ലായ്മ ഇൻഷുറൻസ് പദ്ധതിയിൽ (Unemployment Insurance) ലക്ഷക്കണക്കിന് ആളുകൾ ഇതിനകം രജിസ്റ്റർ ചെയ്തു കഴിഞ്ഞു. കൂടാതെ റമദാൻ, ഈദ്, അന്താരാഷ്ട്ര തൊഴിലാളി ദിനം എന്നിവയോടനുബന്ധിച്ച് തൊഴിലാളികൾക്കായി വലിയ തോതിലുള്ള വിനോദ പരിപാടികളും സമ്മാന വിതരണവും മന്ത്രാലയം സംഘടിപ്പിച്ചിരുന്നു. തൊഴിലാളികൾക്ക് മികച്ച ജീവിതനിലവാരം ഉറപ്പാക്കാൻ കഴിഞ്ഞ വർഷം 1.9 ദശലക്ഷം തൊഴിലാളികൾക്ക് ഉയർന്ന നിലവാരമുള്ള താമസസൗകര്യങ്ങളും ലഭ്യമാക്കിയിട്ടുണ്ടെന്ന് മാനവവിഭവശേഷി സ്വദേശിവൽക്കരണ മന്ത്രാലയം (MoHRE) വ്യക്തമാക്കി.